Kendir ósimligi bahalı talshıqlı egin esaplanıp, Ózbekstanda burınnan jetistirilip kelingen. Onnan tiykarınan ximiya sanaatı, farmakologiya hám kosmetologiyada keńnen paydalanıladı. Kendir ósimliginen texnikalıq may alınadı. Talshıqları bekkem, jumsaq, gigroskopiyalıq bolıp, brezent, qap-qanar, gilem, jip, mebel hám sol sıyaqlı basqa buyımlar tayarlaw ushın qollanıladı.

Tuqımında 20% may saqlaydı hám bul teri iylew, sabın pisiriw hám lak boyaw sanaatı ushın áhmiyetli shiyki zat esaplanadı. Gúnjarası tógin bolıw menen birge, sharwa malları ushın azıqlıq bolıp tabıladı. Paqal qaldıqları qaǵaz hám qurılıs sanaatında keńnen qollanıladı.
Ózbekstanda kendir tiykarınan suwǵarılatuǵın jerlerde egiledi. Házirgi waqıtta mámleketimizde kendir egilgen maydanlar biraz qısqarǵan.
Bul ósimlikti respublikamızda kóbeytiw maqsetinde Koreya menen birgelikte kendir jetistiriw joybarı baslandı. Awıl xojalıǵında bilim hám innovaciyalar milliy orayı hám Koreyanıń “SJ Global” kompaniyası menen birgelikte Tashkent wálayatınıń Joqarı Shırshıq rayonında kendir tuqımları egilip, sınaq jumıslarına start berildi.
– Joqarı Shırshıq rayonındaǵı 11 gektar maydanda, bunnan tısqarı Sırdárya hám Xorezm wálayatında jámi 25 gektarda bıyıl tájiriybe-sınaq jumısları ámelge asırıladı, – deydi Awıl xojalıǵında bilim hám innovaciyalar milliy orayınıń direktorı Shuhrat Otajonov. – Joybardan gózlengen maqset onnan talshıqlı hám maylı egin sıpatında paydalanıw, dizel janılǵısı, biojanılǵı alıw, artqan ónimlerden qurılıs materialların islep shıǵarıwǵa baǵdarlaw hám tájiriybe tabıslı ótkennen soń biziń ilimiy mákememiz tárepinen kendirdiń tuqımgershiligin jolǵa qoyıw.
Keleshekte respublikamız boyınsha sınaqlar jaqsı ótse, bunı keńeytiw boyınsha qosımsha joybarlar ámelge asırıladı.

Sanjar Toshpwlatov,
Uluǵbek Twxtaev (video), ÓzA