Oliy Majlis Senatına Global jasıl ósiw institutı (GGGI) Assambleyasınıń baslıǵı Pan Gi Mun keldi.

Senat Baslıǵı Tanzila Norboeva menen ushırasıwda GGGIdiń Ózbekstandaǵı jumısın keńeytiw, instituttıń “jasıl” transformaciya boyınsha keń kólemli joybarlardı ámelge asırıwdaǵı rolin kúsheytiw, sonday-aq, klimat boyınsha Parij kelisimi sheńberindegi mámlekettiń minnetlemelerin orınlawdı qollap-quwatlaw máseleleri dodalandı.
Aralboyı regionındaǵı ekologiyalıq mashqalalarǵa xalıqaralıq qatnas, sońǵı jılları bul aymaqtı qayta tiklew hám turaqlı rawajlandırıw baǵdarında ámelge asırılıp atırǵan reformalarǵa ayrıqsha itibar qaratıldı.
Toǵaylıqlar jaratıw hám “Jasıl mákan” ulıwma milliy joybarı sheńberindegi jumıslar, sonday-aq, parlament ekspertizasın tereńlestiriw hám “jasıl” ekonomika boyınsha qánigeler tayarlaw baǵdarındaǵı rejeler dodalandı.
Tárepler xalıqaralıq dárejede milliy klimat baslamaların alǵa qoyıw, normativlik-huqıqıy bazanı rawajlandırıw, qorshaǵan ortalıqtıń pataslanıwı hám klimat ózgeriwine qarsı gúresiw tarawında tájiriybe almasıw boyınsha birge islesiwdi bunnan bılay da keńeytiwge kelisip aldı.

N.Abduraimova,
ÓzA