Saudiya Arabstanı 2026-jıldan baslap alkogol ónimlerin satıw hám paydalanıwǵa ruxsat beriwdi rejelestirmekte. Bul qádem 2034-jılı ótkeriletuǵın futbol boyınsha jáhán chempionatına tayarlıqtıń bir bólegi esaplanadı.

Spirtli ishimlikler tek ǵana 600 ge shamalas arnawlı orında satılıwı rejelestirilgen. Bular tiykarınan miymanxanalar, dem alıw orınları hám turistler ushın mólsherlengen aymaqlarda pivo, vino hám sidr satıp alıw múmkin boladı.
Germaniyada jetkilikli muǵdarda kewillilerdi tartıwdıń imkaniyatı bolmasa, 2026-jıldan májbúriy áskeriy xızmetke qaytadı. Bul haqqında mámleket qorǵanıw ministri málim etti.
Ministr tiyisli nızam joybarı kelesi jıldıń 1-yanvarınan kúshke kiriwi múmkin ekenligin atap ótti. Germaniya armiyasında májbúriy áskeriy xizmet 2011-jılı tek tınıshlıq dáwiri ushin biykar etilgen edi.
Indoneziyanıń oraylıq bólimindegi Shıǵıs Yava provinciyasında bir sutka ishinde 11 márte Semeru vulkanı atılıwı baqlandı.
Vulkan atılıwı nátiyjesinde payda bolǵan kúldiń joqarǵı shegi vulkan kraterinen 1200 metr yamasa teńiz qáddinen 4876 metr biyiklikke jetken. Jergilikli xalıq hám turistlerge vulkannan 8 kilometr qubla-shıǵısta kraterge jaqınlaspaw usınıs etilgen.
Franciya Prezidenti Emmanuel Makronnıń Vetnamǵa barǵan waqtında hayalınan shappat jegeni sáwlelengen video sociallıq tarmaqlarda úlken shawqımǵa sebep boldı. Bul jaǵdayǵa Elisey sarayı múnásibet bildirdi.
Videoda Prezident samolyot esiginen kórinedi hám ishte kimdur menen sóylesip atırǵan waqıtta bir qol onıń júzine jaqınlap, iyegine jeńil shappat uradı. Makron bul jaǵdayǵa qısqa tańlanıw bildiredi, biraq dárhal ózin uslap, kameralar aldında sálemlesedi.
Hindstan qáwipsizlik kúshleri shegaranı nızamsız kesip ótiwge urınǵan Pakistan puqarasın atıp óltirdi.
Hindstannıń Shegara qáwipsizligi kúshleri (BSF) bergen bildiriwge bola, waqıya Gujarat shtatında júz bergen.
Shegara boylap patrullik etip atırǵan áskerler «gúmanlı shaxs»tı kórgen hám onı toqtawǵa shaqırǵan. Biraq ol bul buyrıqtı itibarsız qaldırıp, juwırıwın dawam etken. Bunnan keyin áskerler oǵan qarata oq atqanın málim etken.
Rossiya áskerleri 25-mayǵa ótetuǵın túnde Ukrainaǵa dronlar hám raketalar menen eń iri aviacoqqını ámelge asırdı. Bul avia hújimge 298 dron tartıldı. AQSh prezidenti Donald Tramp buǵan múnásibet bildirip, rossiyalı kásiplesi Vladimir Putindi keskin sınǵa aldı.
AQSh basshısı Putin pútkil Ukrainanı basıp almaqshı ekenin, biraq bul «Rossiyanıń qulawına alıp keletuǵının» atap ótti. Tramp óz bayanatında ukrainalı kásiplesi Vladimir Zelenskiydi de sınǵa aldı.

Qaraqalpaqstan xabar agentligi