Ishki isler ministri, general-mayor Aziz Toshpolatov mart ayında usı lawazımǵa tayınlanıwı menen puqaralardıń huqıqları menen máplerin qorǵaw, xalıq penen ashıqtan-ashıq sóylesiw ornatıw jáne olardıń múrájatların úyreniw maqsetinde tek ǵana óziniń emes, al barlıq aymaqlıq ishki isler uyımları basshılarınıń jeke qabıllawların shólkemlestiriwdi jolǵa qoydı.

Jámiyette ashıq-aydınlıqtı támiyinlew, xalıq penen tikkeley sóylesiw arqalı olardıń mashqalalarına sheshim tabıwǵa qaratılǵan ámeliyat bir neshe jıl burın keńnen jolǵa qoyılǵan edi. Biraq arada mámleketlik uyımlardıń birinshi basshılarınıń jeke qabıllawı negedur azayıp ketti.
Qabıl etilgen múrájatlardan 187 i (38 procenti) tiyisli huqıqıy tiykarlar menen unamlı sheshildi. Qalǵan 304 múrájat (62 procenti) boyınsha kompleksli úyreniw talap etiliwi sebepli orınlanıwın qadaǵalawǵa alıw hám sheshimin támiyinlew boyınsha arnawlı wazıypalar júklendi.
Xalıq penen ashıqtan-ashıq sóylesiwdi shólkemlestiriw, puqaralardıń dárti hám táshwishlerin tıńlaw hám olardı sheshiwge baǵdarlaw – mámleketlik uyımlar, ásirese, ishki isler uyımları jumısınıń baslı normasına aylanıp atırǵanı quwanıshlı.
Usı jerde jeke qabıllawlar qanday nátiyje kórsetpekte, degen orınlı soraw tuwıladı. Sebebi nátiyjeleri anıq bolmay atırǵan, yaǵnıy qosımsha úyreniwdi talap etetuǵın múrájatlar kópshilikti quramaqta. Olardıń táǵdiri ne bolǵanı aldaǵı qabıllawlarda ashılıp barılsa, bul sorawǵa tolıq juwap tapqan bolar edik.

Norgul Abduraimova,
ÓzA