2025-jıl yanvar-aprel aylarınıń juwmaǵına bola, Qazaqstan Ózbekstannıń jetekshi sawda sherikleri úshliginde qaldı, dep jazbaqta “Kazinform” agentligi.

Mámleketimizdiń Milliy statistika komiteti usı jıldıń dáslepki 4 ayında sırtqı sawda aylanısı ótken jıldıń usı dáwirine salıstırǵanda 16,3 procentke óskeni, búgingi kúnde Ózbekstan 183 mámleket penen sawda qatnasıqların jolǵa qoyǵanı haqqında jazǵan.
Tiykarǵı birge islesiwshiler arasında Qıtay jetekshi: Bul mámleket penen “alıs-beris” 4,1 milliard dollardan arttı. Bul ulıwma muǵdardıń 17 procentine teń. Rossiya menen eksport-import kórsetkishi 15,1 procent – ekinshi nátiyje.
Úshinshi iri sherik – Qazaqstan menen tovar hám xızmetler almasıw bahası bolsa 1,4 milliard dollarǵa shamalastı. Ósiw ótken jıldıń usı dáwirine salıstırǵanda 168 million dollardı quradı.
Eksport-import qatnası sáykes túrde 986,8×405,7 million dollar.
Astana hám Tashkent óz-ara sawdanı jılına 10 milliard dollarǵa jetkeriw niyetin bildirgen. Usı maqsette Qazaqstan hám Ózbekstan arasında qosımsha 4 sawda koridorı iske qosıladı.
Ótken jılı jámi almasılǵan ónim hám xızmet bahası 4,2 milliard dollardan asqan.

Qaraqalpaqstan xabar agentligi