Yaponiyanıń aldınǵı ilimiy oraylarınan biri bolǵan Kioto qalasındaǵı ATR Computational Neuroscience laboratoriyası insan sanasınıń eń sırlı qatlamlarınan biri – túsler álemine kiriw jolın ashıwshı texnologiyanı islep shıqtı.

Bul texnologiya arqalı insan miyiniń jumısı tiykarında kórilgen túslerdi jazıp alıw hám vizual túrde qayta tiklew imkaniyatı júzege kelmekte.
Bul texnologiya nevrologiya, jasalma intellekt hám súwretlerdi qayta islew tarawındaǵı eń sońǵı jetiskenliklerge tiykarlanadı. Sistema islewi dawamında insan miyiniń jumısı magnit-rezonans tomografiyası (MRI) járdeminde baqlanıp, tús waqtında payda bolatuǵın vizual signallar arnawlı algoritmler arqalı dekodlanadı. Keyin bul maǵlıwmatlar tiykarında kórilgen tústiń shama menen vizual kórinisi tiklenedi.
Internet paydalanıwshıları arasında bul texnologiyaǵa úlken qızıǵıwshılıq baqlanbaqta. Qánigeler bul qatnas keleshekte psixologiyalıq jaǵdaylardı tereń tallaw, túsler tiykarındaǵı keselliklerdi anıqlaw hám sana astı proceslerin úyreniwde jańa sheklerdi ashatuǵının atap ótpekte.
Sonıń menen birge, bul texnologiya átirapında ádep-ikramlılıq hám jeke qol qatılmaslıq penen baylanıslı sorawlar da júzege kelmekte. Túsler – insannıń eń jeke hám názik tájiriybeleri esaplanadı. Olarǵa kiriw hám olardı jazıp alıw imkaniyatı qanday normalar tiykarında tártipke salınıwı kerek ekenligi boyınsha ele kóplegen dodalawlar kútilmekte.

Álbette, bul jetiskenlik insan sanasınıń tereń qatlamların úyreniw jolında áhmiyetli qádem bolıp, keleshekte nevrologiya hám jasalma intellekt tarawlarında jańa revolyuciyalıq sheshimlerge túrtki bolıwı múmkin.

Qaraqalpaqstan xabar agentligi