Ustaz dóretiwshi, belgili jazıwshı Xayriddin Sultannıń shıǵarmaları xalıqshıl, bayanlaw usılı, ómir shınlıǵı, insan ruwxıyatınıń quramalı ózgerislerin jarqın hám oǵada tásirsheń, biytákirar tárizde ashıp beriwi, jetik kórkemligi menen dıqqatqa ılayıq. Bul tárepler belgili jazıwshınıń jaqında ǵana basıp shıǵarılǵan «Aspanıw páleklerde» atlı kitabında da óziniń ayqın kórinisin tapqan.

Paytaxtımızdaǵı «Renessans» kórkem óner sarayında ustaz jazıwshı Xayriddin Sultannıń «Aspanıw páleklerde» atamasındaǵı kitabınıń prezentaciyası bolıp ótti.
Oǵan mámleketimizdiń dóretiwshi zıyalıları – belgili jazıwshı hám shayırlar, ilimpazlar, ádebiyat ıqlasbentleri, ruwxıylıq tarawınıń belsendileri hám keń jámiyetshilik wákilleri qatnastı.
Ilajda atap ótilgenindey, búgingi kúnde Jańa Ózbekstanda Prezidentimiz Shavkat Mirziyoevtiń basshılıǵında barlıq tarawlar qatarında ilim, tálim-tárbiya, mádeniyat, kórkem óner hám ádebiyat, kitap hám kitapqumarlıqtı rawajlandırıw baǵdarında jańadan-jańa baslamalar alǵa qoyılmaqta.
Jámiyetimizde xalıqtıń mádeniy dárejesin hám kitapqumarlıq mádeniyatın arttırıwǵa baylanıslı áhmiyetli hújjetlerdiń orınlanıwın támiyinlew boyınsha baslanǵan úlken jumıslar, milliy baǵdarlamalar izbe-iz dawam ettirilmekte. Mámleketimiz basshısınıń xalqımızdı kitapqumar milletke aylandırıwǵa baylanıslı iygilikli umtılısları mámleket kóleminde keńnen en jayıp, ulıwma milliy háreketke aylanǵanı itibarǵa ılayıq.
«Ózbekstan – 2030» strategiyasınıń tiykarǵı maqsetlerinen biri de jaslardıń ruwxıy dúnyasın jetelistiriwdiń áhmiyetli shárti sıpatında kitapqumarlıqtı rawajlandırıw hám úgit-násiyatlawdan ibarat ekeni bárshege belgili. Bul ibratlı baslama bolsa elimizde xalqımız, ásirese, jas áwladtıń kitapqa bolǵan qızıǵıwshılıǵın kúsheytiwge mámleketlik siyasat dárejesinde itibar qaratılıp atırǵanınıń ayqın kórinisi bolıp esaplanadı.
Áne usı iygilikli maqsette mámleketimiz kóleminde «Jas kitapqumar,» «Zeyinli kitapqumar,» «Jas kitapqumar shańaraq» sıyaqlı qızıqlı tańlawlar, «Jaslar ushın mıń kitap,» «Bilim taratıp,» «Kitap kárwanı» akciyaları, kitap bayramları hám yarmarkaları, ádebiyat háptelikleri turaqlı shólkemlestirilmekte.
Jaqında Ferǵana wálayatında Xalıqaralıq kitapqumarlıq festivalı joqarı dárejede shólkemlestirilip, oǵan dúnyanıń 50 den aslam mámleketinen kitapqumarlar, belgili shayır hám jazıwshılar, zıyalılar qatnasqanı Ózbekstanda kitapqumarlıq, milliy ádebiyat, kórkem dóretiwshiliktiń rawajlanıwı jolındaǵı úlken itibardıń ámeliy nátiyjesi bolıp esaplanadı.
Maǵlıwmatlarǵa qaraǵanda, búgingi kúnde elimizde 600 den aslam baspa, 700 ge shamalas kitap dúkanı, sonıń menen birge, kitap jetkerip beriw xızmetleri hám onlayn sawda platformaları jumıs alıp barmaqta.
Bul bolsa mámleketimiz basshısınıń kitapqumarlıqtı rawajlandırıwǵa baylanıslı ibratlı ideyaları turmısta óziniń ámeliy kórinisin tawıp atırǵanın kórsetpekte. Milliy ádebiyatımız, kitapqumarlıqtıń rawajlanıwına qaratılıp atırǵan itibar kórkemlik jaqtan jetik jańa shıǵarmalardıń jaratılıwında tiykarǵı faktor bolmaqta.
Ustaz dóretiwshi, belgili jazıwshı Xayriddin Sultan qálemine tiyisli «Aspanıw páleklerde» atlı kitap ózbek ádebiyatında derlik jarıtılmaǵan tema – ushıwshılar turmısına baǵıshlanǵanı menen dıqqatqa ılayıq. Watanlaslarımız simvolikalıq mánide hám háwes etip «aspan lashınları» dep ataytuǵın mashaqatlı kásip iyeleriniń turaqlı mártlik hám jigerlilikti talap etetuǵın jumısı, olardıń ayrıqsha jaǵdaylardaǵı kewil keshirmeleri, isenim hám erk-ıqrarı, muhabbat hám parızǵa sadıqlıq sezimleri tereń dramatizm menen súwretlenedi.
Kútilmegen, keskin waqıyalarǵa bay, keskin syujet baǵdarına iye gúrrińlerde bas qaharmanlardıń ruwxıy mártligi hám adamnıń ázzilikleri, insaniyat ruwxıyatınıń sırlı jumbakları tákirarlanbas xarakterler tımsalında kórinedi.
Tanıstırıw máresimine ullı jazıwshımız Abdulla Qadiriydiń: «Házirshe, biz jańa dáwirge qádem tasladıq, biz hár tárepleme usı jańa dáwirdiń jańalıqlarına erisemiz hám jańalanıwǵa ózimizde minnetleme sezemiz,» degen sózleri bas ideya sıpatında tańlanǵanında tereń simvolikalıq máni bar.
Kitap prezentaciyasına baǵıshlanǵan ádebiy ánjuman oǵada qızıqlı, payızlı, jańasha máni hám mazmunǵa bay tárizde shólkemlestirilgeni menen dıqqatqa ılayıq boldı.
Teatrlastırılǵan saxnalar, prozalıq, poeziyalıq hám muzıkalıq tallawlar, kino kórinisleri tanıstırıwda qatnasqan dóretiwshilerde umıtılmas tásir qaldırdı.
Prezentaciya Ózbekstan Jazıwshılar awqamı, Mádeniyat ministrligi, Kinematografiya agentligi, Ruwxıy-aǵartıwshılıq orayı, «Uzbekistan Airways» kompaniyası hám Kórkem óner akademiyası menen birgelikte shólkemlestirildi.
Tema hám waqıyaǵa qatnas jasaw, forması jaǵınan da jańasha talqınǵa iye bul kitap «Ádebiyat» baspası tárepinen basıp shıǵarılǵan.
Bir sóz benen aytqanda, belgili jazıwshı Xayriddin Sultannıń «Aspanıw páleklerde» shıǵarması ádebiyatqa, jaqsı kitapqa mehiri bálent watanlaslarımız ushın jáne bir sawǵa boldı.

N.Usmonova, ÓzA