Ámiwdárya rayonındaǵı «Amat Twraev» atındaǵı fermer xojalıǵınıń atızında “Nasoslardıń energiya únemlewsheńligin, elektr energiyası támiynatında alternativ energiyanıń úlesin arttırıw” boyınsha ámeliy seminar ótkerildi.

Ilajda rayon hákimleriniń awıl hám suw xojalıǵı máseleleri boyınsha orınbasarları, “Suw jetkerip beriw xızmeti” MK, rayonlıq fermer xojalıqları keńesi, energiya únemlewshi nasos agregatları hám quyash panellerin ornatıw belgilengen hám ornatıw boyınsha óz qálewin bildirgen klaster kárxanaları, fermer xojalıqlarınıń basshıları hám ǵalaba xabar qurallarınıń wákilleri qatnastı.
Seminarda Ámiwdárya rayonı hákimi S.Xojametov, Qaraqalpaqstan Respublikası Suw xojalıǵı ministri B.Yusupov shıǵıp sóylep, fermer xojalıqları esabındaǵı nasoslardıń elektr energiyası talabı ushın quyash panellerin ornatıw boyınsha ámelge asırılǵan jumıslar hám belgilengen wazıypalarǵa toqtap ótti.
Atap ótilgenindey, Prezidentimizdiń basshılıǵında 2024-jıl 7-noyabr kúni awıl xojalıǵında suw hám energiya dáreklerinen aqılǵa uǵras paydalanıw hám shıǵınlardı azaytıw ilajları boyınsha ótkerilgen videoselektor májilisinde 2025-jıl – suw xojalıǵında “Nasoslardıń nátiyjeliligin arttırıw jılı”, dep belgilengen. Joqarıda keltirilgen májilistiń 48-sanlı protokol tapsırmasında hár jılı 1000 fermer xojalıǵın jańa sistemaǵa ótkeriw, onda fermer xojalıqlarına tiyisli nasoslardıń energiya únemlewin támiyinlew, alternativ energiya úlesin arttırıw hám nasos arqalı suwǵarılatuǵın jer maydanların lazerli tegislew sıyaqlı wazıypalar belgilengenligi atap ótilip, ámelge asırılatuǵın jumıslar dodalandı.
Seminarda rayon hákimleri hám “Suw jetkerip beriw xızmeti” mámleketlik kárxanası direktorlarınıń seminar kún tártibindegi máseleleri boyınsha málimlemeleri tıńlandı. Sonday-aq, nasos agregatlarına únemli usıllardı engizgen fermerler nátiyjeliligi haqqında maǵlıwmatlar berdi.
Ótkerilgen kórgizbeli seminarda nasos agregatları ushın jumsalatuǵın elektr energiyasın alternativ usıllardı qollanǵan halda qaplaw máselesi keńnen dodalanıp, orınlanatuǵın jumıslar kelisip alındı.

Qaraqalpaqstan xabar agentligi