Ellikqala rayonında jámiyet salamatlıǵına baǵıshlanǵan jáne bir ámeliy ilaj shólkemlestirildi. Tazabaǵ awılında jaylasqan 64-sanlı shańaraqlıq poliklinika aymaǵında “Bar mehrim usı xalıq ushın, usı Watan ushın” súreni astında tereńlestirilgen medicinalıq tekseriw ótkerildi. Ilaj Ózbekstan Respublikası Densawlıqtı saqlaw ministrliginiń 2025-jıl 18-apreldegi 102-sanlı buyrıǵınıń orınlanıwın támiyinlew hám xalıqtı individual salamatlandırıw rejesi tiykarında ámelge asırıldı.
Tekseriw dawamında, ásirese, sociallıq járdemge mútáj xalıq qatlamına ayrıqsha itibar qaratıldı. Olarda anıqlanǵan joldas kesellikler boyınsha tiyisli tarawlardıń qánigelerine jollamalar berilip, bir waqıttıń ózinde laboratoriyalıq hám instrumentallıq tekseriwler shólkemlestirildi. Bul bolsa medicinalıq xızmettiń sapasın jáne de jaqsılaw imkaniyatın berdi, – dep maǵlıwmat beredi Ellikqala rayonı hákimligi Málimleme xızmeti bólimi.
Ilajda rayonlıq medicina birlespesi hám prokuratura wákilleri de qatnasıp, Prezidentimizdiń PQ-1-sanlı qararı sheńberindegi wazıypalardıń orınlanıwı, orınlardaǵı reformalar, sonıń ishinde, korrupciyaǵa qarsı gúresiw hám jınayatshılıqtıń aldın alıw boyınsha alıp barılıp atırǵan jumıslar boyınsha medicina xızmetkerleri menen ashıq pikirlesti.
Xalıqtıń salamatlıǵına bolǵan bunday itibar keselliklerdi erte anıqlawǵa xızmet etedi hám medicinalıq xızmetke isenimdi bekkemlep, jámiyette salamat turmıs tárizin engiziwge túrtki beredi.

Qaraqalpaqstan xabar agentligi