Usı jılı 25-may kúni Deli qalasında Ózbekstan hám Hindstan joqarı bilimlendiriw mákemeleriniń forumı ótkeriledi. Ilaj Ózbekstan Respublikasınıń Hindstandaǵı elshixanası hám usı eldiń “MD House” kompaniyası menen birgelikte shólkemlestiriledi.

Forumda eki mámlekettiń jetekshi universitet hám institutlarınıń delegaciyaları qatnasadı. Bilimlendiriw tarawındaǵı eki tárepleme birge islesiw perspektivaların dodalaw, sonday-aq, bir qatar óz-ara túsinisiw memorandumlarına qol qoyıw kútilmekte.
Sońǵı jılları hindstanlı jaslardıń Ózbekstanda bilim alıwǵa bolǵan qızıǵıwshılıǵı barǵan sayın artıp atırǵanı baqlanbaqta. Bilimlendiriw sistemasındaǵı izbe-iz reformalar, oqıw baǵdarlamalarınıń xalıqaralıq standartlarǵa muwapıqlıǵı hám sırt elli studentler ushın jaratılǵan qolaylı sharayatlar, sonıń ishinde, inglis tilindegi bilimlendiriw, múnásip jasaw sharayatları hám qáwipsizlik bunıń tiykarǵı faktorları bolıp esaplanadı.
Ánjuman dawamında studentlerdiń sırt elde oqıwın shólkemlestiriwge qánigelesken hind kompaniyaları menen birge islesiwge ayrıqsha itibar qaratıladı.
Joqarı bilimlendiriw Ózbekstan-Hindstan birge islesiwiniń áhmiyetli baǵdarına aylanbaqta. Búgingi kúnde elimizdiń joqarı oqıw orınlarında derlik 10 mıń hindstanlı student bilim alıp, bul kórsetkish ósiwde dawam etpekte.
Deli qalasındaǵı forum eki mámlekettiń bilimlendiriw mákemeleri arasındaǵı baylanıslardı bekkemlew hám akademiyalıq mobillik imkaniyatların keńeytiw ushın áhmiyetli maydan bolıp xızmet etedi.

Aziza ALIMOVA, ÓzA