AQShtıń Kaliforniya universiteti ilimpazları balalar sociallıq tarmaqlarda qansha waqıt ótkerse, olardıń ruwxıy túskinlik belgileri sonsha awır bolatuǵının anıqladı. Biraq, hesh qanday pikir-usınıs joq – depressiyanıń kúsheyiwi Internette ótkeriletuǵın waqıttıń kóbeyiwine alıp kelmeydi.

Izertlewde belgili bolǵanınday, ortasha úsh jıl dawamında sociallıq tarmaqlardan paydalanǵan 9 jastan 13 jasqa shekemgi balalardıń ekran aldında waqıt ótkeriw kúnine 7 minuttan 73 minutqa shekem kóterilgen hám bul waqıt dawamında olarda depressiya belgileri dárejesi 35 procentke artqan. Izertlew 12 000 ǵa shamalas balalardıń maǵlıwmatların óz ishine aldı. Onda hár bir qatnasıwshıdaǵı ózgerislerdi óz aldına baqlaw imkaniyatın beretuǵın baǵdarlamadan paydalanıldı.
“Bul izertlew sociallıq tarmaqlar balalarda depressiya rawajlanıwına úles qosıwı múmkin ekenligi haqqında tikkeley dálillerdi usınadı,” – deydi pediatr hám joybar basshısı doktor Jeyson Nagata.
Sonnan kelip shıǵıp, Amerika pediatriya akademiyası ata-analar hám balalarǵa salamat sanlı ádetlerdi rawajlandırıwǵa járdem beretuǵın shańaraqlıq media rejeden paydalanıwdı usınıs etpekte.
“Balaǵa “Telefonıńdı qoy” dewdiń ózi payda bermeydi. Onlayn waqıttıń zıyanı haqqında ashıq hám qollap-quwatlawshı sáwbetler ótkeriw hám shańaraqlıq keshelerdi ekransız ótkeriw arqalı úlgi kórsetiw áhmiyetli, ásirese, awqatlanıw waqtında hám jatıwdan aldın,” – deydi Jeyson Nagata.
Izertlewshilerdiń atap ótiwinshe, sanlı mákanǵa sanalı hám juwapkershilikli múnásibet balalardıń ruwxıy salamatlıǵı hám abadanlıǵın saqlaw jolı bolıp esaplanadı.

Qaraqalpaqstan xabar agentligi