Bizge belgili, mámleketimiz basshısınıń 2020-jıl 7-sentyabrdegi PP-6061-sanlı pármanı hám PQ-4819-sanlı qararı tiykarında Kadastr agentligi menen Mámleketlik kadastrlar palatası hám onıń aymaqlıq basqarmalarında korrupciyaǵa qarsı gúresiw “komplayens-qadaǵalaw” sisteması engizilgen. Házirgi waqıtta Kadastr agentligi sistemasında jámi 33 shtat birliginde komplaens qadaǵalaw xızmetkerleri jumıs alıp barmaqta.

Kadastr agentliginde korrupciyalıq huqıqbuzarlıqlar hám nızamsız háreketlerdiń aldın alıw sonday-aq, olardı saplastırıw maqsetinde sistemalı jumıslar jolǵa qoyılǵan. Atap aytqanda, Prezidentimizdiń 2022-jıl 11-maydaǵı PQ-240-sanlı qararınıń orınlanıwı sheńberinde Kadastr agentligine júklengen funkciyalarda korrupciyalıq qáwip-qáterler bahalandı hám usı jıldıń may ayında korrupciyalıq qáwip-qáterler kartası hám korrupciyaǵa qarsı gúresiw baǵdarlaması tastıyıqlandı.
Korrupciyanıń aldın alıw boyınsha sistema xızmetkerleri hám puqaralar menen seminar, dógerek sáwbetleri, bayanatlar hám ǵalaba xabar quralları arqalı profilaktikalıq ilajlar ótkerilmekte.
Ózbekstan Respublikasınıń “Mápler soqlıǵısıwı haqqında”ǵı nızamınıń orınlanıwı sheńberinde Kadastr agentligi sisteması jumısında mápler soqlıǵısıwın anıqlaw, aldın alıw hám tártipke salıw maqsetinde mápler soqlıǵısıwın basqarıw boyınsha reje tastıyıqlanǵanın da aytıp ótiw kerek.
Korrupciyaǵa qarsı gúresiw, onıń aldın alıw hám saplastırıw maqsetinde basqarma hám bólim-filiallardıń imaratlarına Kadastr agentliginiń Isenim telefonı hám baylanıs kanalları sáwlelendirilgen bannerler ornatıldı.
Strukturalar tárepinen korrupciyaǵa qarsı gúresiw baǵdarında huqıq qorǵaw uyımları menen tıǵız birge islesiw jolǵa qoyılǵan bolıp, úyrenilgen 21 jaǵday boyınsha materiallar huqıq qorǵaw uyımlarına jiberilgen hám házirgi kúnde sonnan 2 jaǵday boyınsha tiyisli uyımlar tárepinen jınayat isleri qozǵatılǵan.
Kadastr agentliginde korrupciyalıq háreketler haqqında kelip túsken xabarlardı qabıl etiw hám kórip shıǵıw reglamenti, jumısqa qabıl etilip atırǵan talabanlardı tekseriw boyınsha instrukciya tastıyıqlandı.
Sonıń menen birge, korrupciyaǵa qarsı tártip-qaǵıydalardıń nátiyjeliligin monitoring etiw hám qadaǵalaw metodikası, kontragentlerdi tekseriwge baylanıslı instrukciya, korrupciyalıq qáwip-qáterlerdi anıqlaw hám bahalaw metodikası, xızmetkerlerdiń etika hám korrupciyaǵa qarsı gúresiw tarawında oqıtılıwı boyınsha instrukciya shólkemlestirildi. Kadastr agentligi sistemasındaǵı xızmetkerlerdi xoshametlew tártibi haqqındaǵı reje, Kadastr agentliginiń korrupciyaǵa qarsı gúresiw siyasatı, xızmet tekseriwi hám úyreniw ótkeriwdi shólkemlestiriw tártibi haqqındaǵı rejeler qabıl etilgen.
– Fizikalıq hám yuridikalıq táreplerge tiyisli kadastr arxiv fondında saqlanıp atırǵan kadastr hújjetlerin sanlastırıw jumısları ámelge asırılǵan, – deydi Kadastr agentliginiń bas qánigesi Maruf Hamroev. – Nátiyjede jerler hám olardıń iyeleri haqqındaǵı maǵlıwmatlardı tallaw jumısları 3-10 kúnnen bir neshe sekundqa qısqarıwına erisildi. Bul tarawda insan faktorın azaytıw, ashıq-aydın mexanizmdi engiziw hám xızmetkerler menen puqaralardıń tikkeley ushırasıwı hám korrupciyalıq jaǵdaylardıń aldın alıw maqsetinde kadastr tarawı boyınsha 20 ǵa shamalas xızmet túri Mámleketlik xızmetler orayları arqalı ámelge asırılmaqta. Sonday-aq, tarawda mápler soqlıǵısıwına jol qoymaw boyınsha barlıq xızmetkerlerge deklaraciya toltırıw sisteması engizilgen. Jumısqa qabıl etiwde ashıq-aydınlıqtı támiyinlew maqsetinde bolsa milliy vakansiyalar bazasınıń (vacancy.argos.uz) saytlarına bos jumıs orınları haqqında maǵlıwmatlar jaylastırılıp kelinbekte.
Mámleketlik uyımlar hám shólkemlerdiń insan resursların basqarıwǵa baylanıslı jumısın sanlastırıw málimleme sisteması (hrm.argos.uz) arqalı xızmetkerler hám jumısshılardıń sanı, vakansiyalar, sonday-aq, jumısqa jaylasıw ushın talabanlarǵa jumıs beriwshiler tárepinen qoyılatuǵın mamanlıq hám basqa da talaplar haqqındaǵı maǵlıwmatlar járiyalanıp barıladı. Barlıq kategoriyadaǵı xızmetkerlerdiń huqıqıy sanası hám mádeniyatın arttırıw maqsetinde olarǵa korrupciyaǵa qarsı gúresiw ishki sistemasınıń jumısın muwapıqlastırıwshı normativlik hújjetler tarqatılǵan.
Kadastr agentligi tárepinen korrupciyaǵa qarsı gúresiw jumısın ámelge asırıwshı mámleketlik uyımlar hám shólkemler menen turaqlı birge islesiw jolǵa qoyılǵan bolıp, sonıń ishinde, anıqlanǵan nızamsız jaǵdaylar boyınsha toplanǵan hújjetler huqıqıy baha beriw ushın berilip barılmaqta hám Kadastr agentliginiń Korrupciyaǵa qarsı gúresiw bóliminiń xızmetkerleri hám Bas prokuratura janındaǵı Ekonomikalıq jınayatlarǵa qarsı gúresiw departamentiniń operativ xızmetkerleri menen birgelikte korrupciyalıq jaǵdaylardıń aldın alıwǵa qaratılǵan bir qatar ilajlar ótkerilip kelinbekte.

Shahnoza Mamaturopova,
ÓzA