Erteń, 2025-jıl 24-may kúni mekteplerde bıyılǵı oqıw jılı juwmaqlanadı. Usı múnásibet penen bilimlendiriw mákemelerinde “Sońǵı qońıraw” ilajları bolıp ótedi. Bul qońıraw mektep pitkeriwshileri ushın haqıyqatında da sońǵısı bolǵanı ushın da ilaj tolqınlanıwlarǵa tolı boladı.
Bul processte “Sońǵı qońıraw” ilajlarınıń tek ǵana joqarı dárejede emes, al qáwipsiz ótkeriliwi júdá áhmiyetli. Ishki isler ministrligi mine, usı máselege ayrıqsha itibar qaratpaqta.
IIM Jámiyetlik qáwipsizlik departamenti málimleme xızmetiniń baslıǵı Muzifa Sultonova bul baǵdarda islenip atırǵan jumıslar haqqında maǵlıwmat berdi:
– Usı jıldıń 24-may kúni saat 08:00 den 10:00 ge shekem “Sońǵı qońıraw” bayram ilajları respublikamızda jumıs alıp barıp atırǵan 10 mıńnan aslam mákemede mektep oqıwshıları, ata-analar hám jámiyetshilik wákilleriniń qatnasıwında keńnen belgilenutıǵını belgilengen.
Bul bilimlendiriw mákemelerinde 1-klass, 9-klass, 11-klass bolǵan jámi 2 millionnan aslam pitkeriwshi qatnasıwı kútilmekte.
Respublika aymaǵında ótkeriletuǵın ilajlarda qáwipsizlikti támiyinlewge jámi 27 mıńnan aslam Ishki isler ministrligi, Milliy gvardiya, Ayrıqsha jaǵdaylar ministrligi xızmetkerleri hám áskeriy xızmetkerleri biriktirildi.
Ilaj ótkeriletuǵın bilimlendiriw mákemeleri tiyisli juwapker uyımlardıń xızmetkerleri tárepinen tolıq tekseriwden ótkerilip, qorǵaw pultına jalǵanǵan. Videobaqlaw kameraları bolsa aymaqlıq ishki isler uyımlarınıń situaciyalıq oraylarına integraciyalanǵan.
Bunnan tısqarı, mekteplerde oqıw jılı juwmaqlanıwı múnásibeti menen jaslarımız qıyabanlar hám dem alıw baǵlarına dem alıw ushın keliwi kútilmekte. Bul orınlarda qáwipsizlikti támiyinlewge jámi 5 mıńnan aslam huqıq qorǵaw uyımlarınıń xızmetkerleri hám áskeriy xızmetkerler xızmetke biriktirildi.
Aymaqlardaǵı tikkeley jol shetinde jaylasqan mektepler aldında háreket qáwipsizligin támiyinlew maqsetinde jol-patrul xızmeti inspektorları kúsheytilgen tártipte xızmet alıp baradı. Mekteplerdiń jaylasıw ornına qarap transport qurallarınıń háreketi waqtınsha sheklenedi. Usı kúni ilajı bolǵanınsha hámmege jámiyetlik transportta háreketleniwi usınıs etiledi.
Usı jerde barlıq ata-analar hám úlken jastaǵılardan pitkeriwshilerdiń yarım aqshamǵa shekem dem alıw baǵlarında júriwi, spirtli ishimlikler, temeki ónimleri hám qadaǵan etilgen zatlardı paydalanıwı, kóshelerde topar-topar bolıp kortejlerde júriwi, avtomashina, skuter, samokatlardı alıp basqarıwı, kanal hám shomılıw basseynlerinde júziwi, ózleriniń janında ótkir kesiwshi, shanshıwshı hám basqa da insannıń ómiri hám densawlıǵı ushın qáwipli bolǵan buyımlardı alıp júriwine jol qoymawdı sorap qalamız.
N.Abduraimova,
ÓzA