Aralboyı regionında ekologiyalıq mashqalalardı úyreniw hám olardı saplastırıw jolında jaslardıń belsendiligin arttırıw maqsetinde usı jıldıń 28-31-may kúnleri Turizm komiteti tárepinen hár jılı ótkeriletuǵın “Aral teńizine poezd” jaslar ekologiyalıq akciyası shólkemlestirilmekte.
Akciya sheńberinde mámlekettiń hár qıylı aymaqlarınan kelgen qábiletli, belsendi hám ekologiyalıq sanalı jaslar Aralboyı aymaǵına sayaxat etip, bul jerde júzege kelgen ekologiyalıq apatshılıq aqıbetlerin óz kózleri menen kóredi hám bul arqalı ekologiyalıq mashqalalarǵa biypárwa bolmawǵa shaqırıladı.
Ilaj dawamında jaslar ekologiyalıq seminarlar, sociallıq joybarlar prezentaciyası, nál egiw, ekologiyalıq tazalaw jumısları sıyaqlı ilajlarda qatnasadı. Sonday-aq, olar jergilikli xalıqtıń turmısı, áyyemgi tariyxıy estelikler menen tanısıw imkaniyatına da iye boladı.
Akciya tek ǵana ekologiyalıq mashqalalar haqqında xabardarlıqtı arttırıp qoymastan, al jaslar arasında ekologiyalıq mádeniyattı qáliplestiriw, olardı qorshaǵan ortalıqtı saqlawǵa baǵdarlawǵa xızmet etedi. Bul baslama arqalı ekologiyalıq juwapkershilik sezimi, watansúyiwshilik hám sociallıq belsendilik sıyaqlı áhmiyetli pazıyletler bekkemlenedi.
Qaraqalpaqstan xabar agentligi