Shavkat Mirziyoev “Respublikada densawlıqtı saqlaw sistemasın hám xalıqqa medicinalıq xızmet kórsetiw principlerin jetilistiriw arqalı tarawdı reformalawdı izbe-iz dawam ettiriw ilajları haqqında”ǵı pármanǵa qol qoydı. Bul haqqında “Huquqiy axborot” xabar berdi.
Endi shańaraqlıq poliklinikalar, shańaraqlıq shıpakerlik punktleri hám olarǵa biriktirilgen mákemeler, sonıń ishinde, máhálle medicina punktleri, xızmet kórsetip atırǵan xalıqtıń sanınan kelip shıqqan halda yuridikalıq statusqa iye shańaraqlıq poliklinikalar hám olardıń filialları sıpatında qayta shólkemlestiriledi.
Jańa sistema sheńberinde xalıqqa shańaraqlıq shıpaker, pediatr, akusher-ginekolog hám diagnostika xızmetleri kórsetiledi. Sonday-aq, stomatologiya xızmeti autsorsing tiykarında jolǵa qoyıladı. Puqaralarǵa ózlerine qolaylı bolǵan shańaraqlıq shıpakerdi erkin tańlaw imkaniyatı jaratıladı. Bul arqalı medicinalıq xızmettiń sapasın arttırıw, báseki ortalıǵın qáliplestiriw hám nawqaslardıń huqıqların keńeytiw názerde tutılmaqta.
Sonıń menen birge, shańaraqlıq poliklinikalarda jumıs alıp barıp atırǵan medicina xızmetkerleri tek ǵana tolıq stavkada isleydi. Onda olardıń jumıs nátiyjeliligi hám xızmet sapasına ayrıqsha itibar qaratıladı. Hár bir medicina brigadasına 3 mıńǵa shekem xalıq biriktiriliwi múmkin bolıp, strategiyalıq maqset sıpatında 2030-jılǵa shekem bul kórsetkish 1,7 mıńǵa shekem qısqartılıwı belgilengen.
Sonday-aq, shańaraqlıq poliklinikadan 10 kilometrden uzaqta jaylasqan máhállelerde jasawshı xalıq ushın medicina xızmetkerleri tárepinen kóshpeli medicinalıq xızmet kórsetiliwi jolǵa qoyıladı. Bul arqalı alıs aymaqlardaǵı xalıqqa da birdey dárejede medicinalıq xızmet kórsetiliwi támiyinlenedi. Jańa reformalar mámlekette medicinalıq xızmetlerdiń sapasın arttırıw hám xalıqtıń salamatlıǵın jaqsılawda áhmiyetli tiykar bolıp xızmet etedi.