Ózbekstan Respublikası Prezidentiniń 2025-jıl 14-marttaǵı “Shańaraq hám hayal-qızlardı qollap-quwatlaw sistemasın bunnan bılay da jetilistiriw ilajları haqqında”ǵı qararı menen 2025-jılı 2 million hayal-qızdıń bántligin támiyinlew, 250 mıń hayal-qızdı kásip-óner hám isbilermenlikke oqıtıw, 250 mıń hayal-qızdı joqarı bilimlendiriw menen qamtıp alıw, sonday-aq, 50 mıń járdemge mútáj hayal-qızlardı sanatoriylarda salamatlandırıw hám olarda isbilermenlik kónlikpelerin qáliplestiriw boyınsha motivaciyalıq seminarlar shólkemlestiriwge qaratılǵan tiykarǵı maqsetli kórsetkishler belgilendi.

Sawda-sanaat palatası 2025-jıl 1-maydan baslap “Birge islesiwshi isbilermen” baǵdarlamasın jolǵa qoyadı. Baǵdarlama óz biznesin shólkemlestirmekshi bolǵan hayal-qızlarda isbilermenlik kónlikpelerin qáliplestiriw, kooperaciya tiykarında hayal-qızlardıń isbilermenlik jumısın jolǵa qoyıwǵa járdemlesiw, jergilikli hám xalıqaralıq elektron platformalarda hayal-qızlarǵa óz ónimlerin jaylastırıw hám satıwǵa járdemlesiwdi názerde tutadı.
“Hamroh” isbilermen hayal-qızlardı qollap-quwatlaw baǵdarlaması sheńberinde 2025-jıl 1-maydan baslap:
• hayal-qızlarǵa “jasıl joybarlar” hám IT tarawındaǵı joybarlardı ámelge asırıwǵa, sonday-aq, keminde 5 hayal-qızdıń isbilermenligin jolǵa qoyıwǵa járdem bergen 1 mıń “ustaz” isbilermenge 50 million sumǵa shekem grant ajıratıw shólkemlestiriledi;
• unamlı kredit tariyxına iye bolǵan hayal-qızlarǵa 100 million sumǵa shekem girewsiz kredit ajıratıladı;
• hayal-qızlar tárepinen kredit esabınan satıp alınıp atırǵan ásbap-úskeneler jetkerip berilgenge shekem “Isbilermenlikti rawajlandırıw kompaniyası” akcionerlik jámiyeti kepillik beredi.
Akcionerlik-kommerciyalıq “Xalıq banki”ne Sawda-sanaat palatası menen birgelikte “Joybarlar fabrikası” platforması negizinde 2025-jıl 1-iyulge shekem tómendegi imkaniyatlarǵa iye “Isbilermen hayal-qızlar” platformasın iske qosıw tapsırıldı:
• isbilermen hayal-qızlarǵa shiyki zat satıp alıwǵa járdemlesiw;
• óz ara kooperaciyanı keńeytiw hám ónimlerdi satıw ushın bazar tabıw;
• zárúr qánigelerdi izlew;
• joybarlar sheńberinde júzege kelip atırǵan mashqalalardı anıqlaw hám olarǵa sheshim tabıw.
Sawda-sanaat palatasınıń usınısına bola, tómendegi wazıypalardı ámelge asıratuǵın Isbilermen hayal-qızlar keńesi shólkemlestirilmekte:
• turaqlı túrde aymaqlarǵa shıǵıp, isbilermen hayal-qızlardıń mashqalaların úyreniw hám olardı saplastırıw boyınsha usınıslar islep shıǵıw;
• isbilermen hayal-qızlardıń aldınǵı tájiriybelerin basqa aymaqlarda ǵalaba en jaydırıwǵa járdemlesiw;
• hayal-qızlar menen mashqalalardı sheshiw hám biznes ideyaların ámelge asırıwda mánzilli islesiw;
• sistemalı mashqalalardı sheshiw boyınsha Húkimet hám Oliy Majlis Nızamshılıq palatasına turaqlı usınıslar kirgizip barıw.
Hújjet penen hayal-qızlardı isbilermenlik jumısına tartıw hám hayal-qızlar isbilermenligin rawajlandırıwdıń bir pútin sistemasın tómendegi baǵdarlarda engiziw názerde tutılmaqta:
“Bizneske dáslepki qádem” – (SSP) biznes kónlikpesine iye bolmaǵan intaker hayal-qızlardı anıqlaw hám olardı isbilermenlik tiykarlarına oqıtıw;
• “Biznesti jolǵa qoyıw” – (AT “Xalıq banki” hám basqa bankler) ózin-ózi bánt etken hayal-qızlarǵa kishi isbilermenlik jumısın shólkemlestiriwge járdemlesiw;
“Biznesti keńeytiw” – (“Hamroh” hayal-qızlar isbilermenligin qollap-quwatlaw kompaniyası” JShJ) biznes-rejeler islep shıǵıw, qarjılandırıw hám bazar tabıw;
“Biznesti rawajlandırıw” – (SSP) “CHempion isbilermenler” baǵdarlaması sheńberinde 50 eń belsendi hayal-qızlar menen mánzilli islep, olardıń jıllıq aylanısın keminde 100 milliard sumǵa jetkeriwge járdemlesiwden ibarat.

G.Jollibaeva, Qaraqalpaqstan Respublikası hákimshilik sudı sudya járdemshisi.

Qaraqalpaqstan xabar agentligi.