Kegeyli rayonındaǵı 4-sanlı ulıwma orta bilim beriw mektebinde Qaraqalpaqstan ádebiyatı hám baspasóziniń rawajlanıwına salmaqlı úles qosqan belgili shayır, awdarmashı, Qaraqalpaqstanǵa xızmet kórsetken jurnalistler – Yaqıpbay Ajimov hám Orazbay Sátbaevlardıń 70 jıllıq yubileyine baǵıshlanǵan «Úsh áwlad – ádebiy miyrasqa húrmet keshesi» bolıp ótti.

Ilajdı Nuranıy qorı Kegeyli rayonlıq bóliminiń baslıǵı T.Davletov ashtı hám basqarıp bardı.
Onda Qaraqalpaqstan Jazıwshılar awqamınıń baslıǵı Keńesbay Karimov, «Ámiwdárya» jurnalınıń bas redaktorı Xalila Dáwletnazarovlar shayırlardıń ómiri hám dóretiwshiligi haqqında ilaj qatnasıwshılarına keń túrde aytıp berip, yubilyarlarǵa Qaraqalpaqstan Jazıwshılar awqamı tárepinen tayarlanǵan estelik sawǵaların tapsırdı.
Sonı aytıp ótiwimiz kerek, Kegeyli rayonınıń «Jalpaqjap» awıl puqaralar jıyınında tuwılıp ósken bul dóretiwshiler, qaraqalpaq ádebiyatı hám baspasózinde kóp jıllar dawamında jemisli miynet etip, ózleriniń kórkem dóretpeleri menen ádebiyatımızda salmaqlı orın iyelep kelmekte.
Olardıń dóretiwshilik isleri, turmıslıq tájiriybesi hám ádebiy miyrası elimiz zıyalıları hám jas áwlad wákilleri ushın haqıyqıy dóretiwshilik mektebi bolıp xızmet etip atır.
Keshede Qaraqalpaqstanǵa xızmet kórsetken jurnalistler Yaqıpbay Ajimov hám Orazbay Sátbaevlar shıǵıp sóylep, bunday ádebiy ilajdı shólkemlestirgeni ushın Qaraqalpaqstan Jazıwshılar awqamı hám Kegeyli rayonı hákimligine minnetdarshılıqların bildirip, ózleriniń jańa qosıqlarınan oqıp berdi.

Adilbay Orazov,
Qaraqalpaqstan xabar agentligi sholıwshısı.