Usı jıldıń may ayı mámleketimizdiń jámiyetlik-siyasiy turmısında sport waqıyalarına bay bolıwı menen ajıralıp turatuǵın dáwir sıpatında tariyxta qaladı, desek, qátelespeymiz.

Áyne oyanıw hám jasarıw máwsimi báhárdiń sońǵı ayında mámleketimizde sheber sportshılardı tabıwdıń jańa sisteması bolǵan “Jańa Ózbekstan Olimpiada shoqqıları” jarıslarına start berilgen bolsa, suw sportı túrleri, at sportı, gúres, erkin gúres, boks, taekvondo, voleybol, gandbol, basketbol, oq jaydan atıw sıyaqlı baǵdarlarda ótkerilgen chempionatlar haqıyqıy sport bayramı kórinisin aldı.
Ózbekstan Respublikası Sport ministrliginde usı jıldıń 22-25-may kúnleri paytaxtımızda dzyudo boyınsha jaslar hám jas óspirimler arasında Uchqun Murodov esteligine baǵıshlanǵan Aziya kubogi hám Ózbekstan Respublikası Prezidenti sıylıǵı ushın usı jıldıń 28-31-may kúnleri Nókis qalasında belbewli gúres boyınsha jas óspirimler hám qızlar arasında shólkemlestiriletuǵın kontinent hám jáhán chempionatlarına tayarlıqqa baǵıshlanǵan shólkemlestiriw komiteti májilisinde may ayındaǵı sport ilajlarınıń áhmiyeti hám ornı haqqında sóz etildi.
Ózbekstan Respublikası sport ministriniń orınbasarı Sh.Mahmudovtıń basshılıǵında ótkerilgen májilis dawamında abıraylı jarıslarǵa puqta tayarlıq kóriw, sırt mámleketlerden keletuǵın sport delegaciyaların múnásip kútip alıw, jaylastırıw, olardıń qáwipsizligi hám salamatlıǵın saqlaw, sırt mámlekettiń sport delegaciyaları ushın elimizdiń dıqqatqa ılayıq tariyxıy hám zamanagóy orınlarına sayaxatlar shólkemlestiriw, jarıslardıń texnikalıq hám taktikalıq táreplerine ayrıqsha itibar qaratıw máseleleri dodalandı.
Hár bir baǵdar boyınsha juwapkerler, atap aytqanda, Qaraqalpaqstan Respublikası juwapkerleri, Ózbekstan belbewli gúres hám Dzyudo federaciyası juwapkerleri, tiyisli shólkem hám uyımlardıń wákilleri islengen jumıslar boyınsha málimlemeler berdi.
Dodalawlar procesinde atap ótilgenindey, mámleketimiz xalıqaralıq jarıslar orayına aylanıp baratırǵanı, abıraylı sport ilajları sebepli Ózbekstanǵa keletuǵın xalıqaralıq sport shólkemleriniń wákilleri, sheber sportshılardıń sanı artıp atırǵanı elimizde sport turizminiń rawajlanıwın jańa basqıshqa kótermekte.
Májilis juwmaǵında bul baǵdardaǵı jumıslardı jáne de kúsheytiw, sonday-aq, sheshimin kútip atırǵan máseleler boyınsha juwapkerlerge anıq wazıypalar júklendi.

ÓzA