Turaqlı awıl xojalıǵı óndirisin xoshametlew, Aralboyı ekosistemasın bekkemlew hám regionnıń eksport potencialın keńeytiw maqsetinde Aralboyı xalıqaralıq innovaciya orayı Germaniyanıń GIZ xalıqaralıq birge islesiw jámiyeti, Ózbekstan Respublikası Ekologiya, qorshaǵan ortalıqtı qorǵaw hám klimat ózgeriwi ministrligi menen birgelikte, sonday-aq, Qaraqalpaqstan Respublikası Joqarǵı Keńesiniń járdeminde “Qaraqalpaqstan sharayatında gúnji sortlarınıń selekciyası hám baslanǵısh tuqımgershiligin shólkemlestiriw” keń kólemli joybarın ámelge asırıwǵa kiristi.

Joybardıń tiykarǵı maqseti mexanizaciyalasqan óndiris talapları hám xalıqaralıq bazarlardıń talapların esapqa alǵan halda aymaqtıń agroklimat sharayatlarına sáykes keletuǵın gúnjiniń joqarı ónimdarlı sortların selekciyalawdan ibarat. Gúnji quramında 68 procentke shekem may bolǵan bahalı maylı egin bolıp, oǵan azıq-awqat sanaatında da, kosmetologiyada da talap joqarı. 1 gektardan 30-35 million sumǵa shekem dáramat alınadı.
Bul joybar sheńberinde dúnyanıń 30 dan aslam mámleketinen Qaraqalpaqstanǵa gúnjiniń 18 úlgisi alıp kelindi. Olar tiykarında jańa, shıdamlı hám zúráátli sortlardı jaratıw boyınsha selekciya jumısları alıp barılmaqta.
Mexanizaciya járdeminde jıynap alıwǵa jaramlı sortlardı jaratıwǵa ayrıqsha itibar qaratılmaqta. Onda dánleriniń jarılıwına shıdamlı hám bir tegis pisetuǵın liniyalar tańlap alındı.
Joybar hám agrar, hám ekonomikalıq táreplerdi qamtıp alıwı menen áhmiyetli. Xalıqaralıq bazarlarda talap joqarı bolǵan gúnji jetistiriw kólemin arttırıw regionnıń eksport potencialın keńeytiw, investiciyalar hám valyuta túsimlerin tartıw ushın sharayat jaratadı.
Ayrıqsha baǵdarda Qaraqalpaqstandaǵı fermer xojalıqları arasında tabıslı tájiriybe hám texnologiyalardı ǵalaba en jaydırıw názerde tutılǵan. Bul klimat ózgeriwi sharayatında awıl xojalıǵın turaqlı rawajlandırıw, xalıqtıń bántligin támiyinlew hám azıq-awqat qáwipsizligin bekkemlewge xızmet etedi.

Qaraqalpaqstan xabar agentligi