Senattıń Xalıqaralıq qatnasıqlar, sırtqı ekonomikalıq baylanıslar, sırt el investiciyaları hám turizm máseleleri komitetiniń májilisi bolıp ótti.

Májiliste “Ózbekstan Respublikası menen Birlesken Arab Ámirlikleri arasında puqaralıq hám ekonomikalıq isler boyınsha huqıqıy járdem kórsetiw haqqındaǵı Kelisimdi (Tashkent, 2024-jıl 27-sentyabr) ratifikaciyalaw haqqında”ǵı nızam hár tárepleme dodalandı.
Kelisimde eki mámleket arasında puqaralıq hám ekonomikalıq isler boyınsha huqıqıy járdem kórsetiw maqsetinde birge islesiwdi jolǵa qoyıw, sonday-aq, hár eki mámleket puqaraların bir-biriniń aymaǵında teń huqıqıy qorǵaw menen támiyinlew jáne puqaralıq hám ekonomikalıq máseleler boyınsha sud hám huqıq qorǵaw uyımlarına múrájat etiw imkaniyatın jaratıw názerde tutılǵan.
Bunnan tısqarı, puqaralar arasında júzege keliwi múmkin bolǵan kelispewshiliklerdi sheshiw, sud hújjetlerin tán alıw hám orınlaw sıyaqlı máseleler boyınsha huqıqıy járdem kórsetiw tártibi bar.
Senatorlar kelisimniń ratifikaciyalanıwı eki mámleket arasında puqaralıq hám ekonomikalıq tarawlarda huqıqıy járdem kórsetiwge qaratılǵan birge islesiwdi jańa basqıshqa alıp shıǵıwǵa xızmet etetuǵının atap ótti.
Májiliste “Túrkiy mámleketler shólkeminiń Puqaralıq qorǵanıw mexanizmin shólkemlestiriw haqqındaǵı Kelisimdi (Bishkek, 2024-jıl 6-noyabr) ratifikaciyalaw haqqında”ǵı nızam da kórip shıǵıldı.
Kelisimde shólkemge aǵza mámleketlerdiń ayrıqsha jaǵdaylar uyımları arasında nátiyjeli birge islesiwdi jolǵa qoyıw, tábiyǵıy apatshılıqlar waqtında operativ izlew-qutqarıw jumısların muwapıqlastırıw, bul tarawdaǵı monitoring, tallawlardıń nátiyjelerin jáne óz-ara tájiriybe almasıwdı sistemalastırıw hám óz-ara járdem arqalı birge islesiwdi jańa basqıshqa kóteriw sıyaqlı máselelerdiń huqıqıy tiykarları menen mexanizmleri belgilengen.
Senatorlardıń pikirinshe, bul nızamnıń qabıl etiliwi mámleketimizde ayrıqsha jaǵdaylarǵa tayarlıq ilajların jáne de nátiyjeli shólkemlestiriwde, tábiyǵıy apatshılıqlar aqıbetinde júzege keletuǵın sociallıq-ekonomikalıq mashqalalardı saplastırıwda hám regionallıq qáwipsizlikti támiyinlewde mámleketleraralıq awızbirshilik hám birge islesiwge tiykar boladı.
Senatorlar, xalıq deputatları jergilikli keńesleriniń turaqlı komissiyalarınıń aǵzaları, qánige hám ekspertler jáne ǵalaba xabar qurallarınıń xızmetkerleri qatnasqan májilis juwmaǵında komitettiń tiyisli qararları qabıl etildi.

N.Abduraimova,
ÓzA