Xabar berilgenindey, Sanlı texnologiyalar ministrligi delegaciyasınıń Yaponiyaǵa saparı sheńberinde bir neshe IT kompaniyalar menen birge islesiw kelisimlerine erisildi.
Ushırasıwlarda eki mámleket ushın da IT tarawın jáne de rawajlandırıwda paydalı bolatuǵın joybarlar dodalandı. Ásirese, MKT tarawındaǵı qábiletli jaslardıń baslamaların qollap-quwatlaw, olardıń mamanlıǵın arttırıw, tarawǵa jáne de qızıqtırıw máselelerine ayrıqsha toqtap ótildi.
Sapar dawamında erisilgen jańalıqlardan jáne biri Tokio orayında IT Park Ózbekstannıń wákillikli ofisiniń ashılıwı boldı. Bul ilaj Ózbekstan hám Yaponiya arasında IT tarawındaǵı birge islesiwdi bekkemlew hám jáne de keńeytiw maqsetinde shólkemlestirildi.
Qánigelerdiń maǵlıwmat beriwinshe, wákilxana ofisin ashıwdan tiykarǵı maqset – Yaponiya kompaniyaları menen IT-autsorsing, investiciya hám bilimlendiriw tarawlarında birge islesiwdi rawajlandırıw, IT Parktiń imkaniyatları haqqında tikkeley maǵlıwmat beriw jáne Yaponiya bazarındaǵı biznes sherikler ushın isenimli baylanıs ornın jaratıwdan ibarat.
Máresim sheńberinde IT Parktiń Yaponiya bazarındaǵı rejeleri, IT xızmetleri, salıq jeńillikleri hám kadrlar tayarlaw baǵdarlamaları haqqında prezentaciya ótkerildi.
Sonday-aq, IT Park hám “Digital Knowledge” kompaniyası arasında wákillikli ofistiń jumısın birgelikte jolǵa qoyıw, Yaponiya kompaniyaları menen baylanısıw hám olardı Ózbekstannıń IT bazarına tartıw baǵdarında birge islesiw memorandumına qol qoyıldı.
IT Parktiń Tokio qalasındaǵı wákillik ofisi Yaponiya kompaniyaları ushın isenimli baylanıs ornı, rezident kompaniyalar ushın bolsa jańa birge islesiw esigi wazıypasın atqaradı. Bul baslama eki mámleket arasındaǵı IT, bilimlendiriw hám innovaciya tarawlarındaǵı baylanıslardı jańa basqıshqa alıp shıǵıwǵa xızmet etedi.
ÓzA