Ámeldegi nızamshılıq talapların biliw hám olarǵa ámel etiw bajıxana nızamshılıǵınıń buzılıwı menen baylanıslı huqıqbuzarlıqlardıń aldın alıwǵa xızmet etedi.

Huqıqbuzarlıqlar profilaktikası sheńberinde “Nókis-aeroport” shegara bajıxana postı arqalı háreketlenip atırǵan puqaralarǵa bajıxana nızamshılıǵındaǵı ózgerisler hám jańalanıwlar boyınsha túsinik jumısları alıp barıldı.
Atap aytqanda, Ózbekstan Respublikası Ministrler Kabinetiniń usı jıl 19-apreldegi “Ayırım túrdegi tovarlardı bajıxana shegarası arqalı alıp ótiw tártibin bunnan bılay da jetilistiriw ilajları haqqında”ǵı qararınıń talapları tiykarında hawa transportında fizikalıq tárepler jaǵınan jeke mútájlikleri ushın kommerciyalıq emes maqsetlerde respublikaǵa alıp kiriletuǵın tovarlardı bajısız alıp kiriw norması 1000 AQSh dolları muǵdarında belgilengeni, usı muǵdardan artqan tovarlar ushın belgilengen tártipte bajıxana tólemleriniń óndiriliwi boyınsha túsindiriw jumısları alıp barıldı.
Sonday-aq, post xızmetkerleri tárepinen fizikalıq táreplerdiń elimizge bajısız alıp kiretuǵın hám onnan bajısız alıp shıǵatuǵın ayırım tovarlardıń muǵdarı, normaları kórgizbeli qurallar tiykarında tanıstırıldı.

Qaraqalpaqstan xabar agentligi