Nızam joybarına sholıw

Elimizde jas óspirim balalarǵa nızamsız diniy sabaq beriw jaǵdayları jıldan-jılǵa kóbeyip barmaqta. Atap aytqanda, házirgi waqıtta sociallıq tarmaqlar arqalı virtual diniy bilim beriw jaǵdayları kóbeymekte.
Oǵan sebep nızamsız diniy bilim beriw jumısı joqarı dáramat keltiredi. Sonday-aq, nızamshılıqta nızamsız diniy bilim bergeni ushın belgilengen jaza ilajları jeńil. Bul bolsa huqıqbuzıwshılar tárepinen usı túrdegi huqıqbuzarlıqtı qayta islew jaǵdayların keltirip shıǵarmaqta. Yaǵnıy, huqıqbuzıwshıǵa qollanılǵan jaza sharası islengen qılmısqa salıstırǵanda jeńilligi qaytadan isleniwine sebep bolmaqta.
Sonnan kelip shıǵıp, bala huqıqlarınıń kepilliklerin bunnan bılay da bekkemlew, balalardıń hár tárepleme kamalǵa keliwi hám abadanlıǵı ushın barlıq sharayatlardı jaratıw maqsetinde Jınayat kodeksine olardıń bilim alıw huqıqın bunnan bılay da bekkemlewge qaratılǵan qosımsha kirgizilmekte. Oliy Majlis Nızamshılıq palatasınıń kúni keshe bolıp ótken májilisinde qabıl etilgen “Ózbekstan Respublikası Jınayat kodeksiniń 229/2-statyasına qosımsha kirgiziw haqqında”ǵı nızam joybarı usı máselege qaratılǵan.
Bul hújjet joybarı haqqında deputat Abdullo Aslonov tómendegilerdi atap ótti:
– Jas óspirim balalarǵa nızamsız diniy sabaq beriw jaǵdaylarınıń kóbeyip atırǵanı hár birimizdi táshwishke saladı. Maǵlıwmatlarǵa qaraǵanda, sońǵı 5 jılda 13 mıńǵa shamalas bala nızamsız diniy bilim alǵan. Olarǵa tiykarınan “ójire”lerde, sonday-aq, Internet jáhán málimleme tarmaǵı arqalı, shet tillerin úyretiw nıqabı astında ashılǵan til úyretiw oraylarında diniy bilim berilgenligi anıqlanǵan.
Jınayat kodeksiniń 229/2-statyasına kirgizilip atırǵan qosımshaǵa bola, arnawlı diniy maǵlıwmatı bolmay turıp yamasa jeke tártipte diniy táliymattan sabaq beriw jas óspirim shaxsqa qarata islengen bolsa, tikkeley jınayıy juwapkershilik belgilenbekte. Bul tártiptegi huqıqbuzarlıqlardı islegen shaxslarǵa bazalıq esaplaw muǵdarınıń 50 esesinen 100 esesine shekemgi muǵdarda járiyma yamasa 360 saatqa shekem májbúriy jámiyetlik jumıslar yamasa 3 jılǵa shekem erkinen ayırıw jazası qollanılıwı názerde tutılmaqta.
Bul normalar bala huqıqlarınıń kepilliklerin jáne de bekkemlewge, jámiyette salamat ortalıqtı támiyinlewge, balalardıń hár tárepleme rawajlanıwın qollap-quwatlawǵa, olardıń huqıqları menen máplerin jáne de isenimli qorǵawǵa xızmet etedi.

Muhtarama Komilova, ÓzA