Húkimettiń 313-sanlı qararı menen shólkemlesken tárizde sırt elge jumısqa jiberilgen hám barǵan mámleketiniń nızamshılıq hújjetlerin buzıwı nátiyjesinde deportaciya etilgen puqaralardı qaytarıw hám olardı qaytarıw menen baylanıslı qárejetlerdi óndiriw tártibi engiziledi.

Qararǵa bola, sırt elde miynet etiwdi ámelge asırıw dáwirinde sırt mámlekettiń nızamshılıq hújjetlerin buzıwı nátiyjesinde deportaciya etilgen puqaralarǵa tómendegi tásir ilajları qollanıladı:
– deportaciya etilgen puqara Migraciya qorı esabınan qaytarılǵanda, qaytarıw qárejetlerin puqaradan óndirip alıw;
– Migraciya qorı esabınan usınılǵan subsidiya hám kompensaciya summaların qaytarıp alıw;
– 1 jılǵa shekemgi múddet dawamında rawajlanǵan mámleketlerge shólkemlesken tárizde jumısqa jiberiw boyınsha xızmetler kórsetpew.
Deportaciya etilgen puqaralar tómendegi tiykarlarda qaytarıladı:
– olardıń Ózbekstannıń sırt eldegi diplomatiyalıq wákilxanaları hám konsullıq mákemelerine múrájatı;
– olar hám jaqın tuwısqanlarınıń Migraciya agentliginiń sırt eldegi wákilxanaları, aymaqlıq filiallarına múrájatı;
– sırt mámleketlerdiń wákillikli uyımları tárepinen usınılǵan deportaciya etilgen puqaralar boyınsha maǵlıwmatlar.
Deportaciya etilgen puqaralar olardıń transport qárejetlerin qarjılandırıw arqalı qaytarıladı.
Puqaranıń qarjılay járdem kórsetiw haqqındaǵı arzası unamlı kórip shıǵılǵannan soń 1 shi jumıs kúninde Migraciya agentligi hám puqara arasında qarız shártnaması dúziledi.
Shártnamaǵa muwapıq qarjılay járdem alǵan shaxs bul qarjılardıń ornın 30 kún múddette qaplawı kerek,-dep málimleme beredi xabar.uz saytı.

Qaraqalpaqstan xabar agentligi