Prezident Shavkat Mirziyoev jol xojalıǵındaǵı jumıslardıń nátiyjeliligi hám rejedegi joybarlar boyınsha prezentaciya menen tanıstı.

Ózbekstan Respublikası Prezidentiniń 2023-jıl 10-oktyabrdegi qararına muwapıq, bul tarawda basqarıw jetilistirilip, jollar qurıw, ońlaw hám saqlaw boyınsha kóp jıllıq wazıypalar belgilengen edi. Ótken 2 jılda bul maqsetlerge 26 trillion sum ajıratılıp, jámi 40 mıń kilometr jol hám 540 kópir ońlandı. Tarawǵa sırttan tartılıp atırǵan qarjılar da úsh esege arttı.
Biraq ele islenetuǵın jumıslar kóp. Bıyıl 7 mıń kilometr ulıwma paydalanıwdaǵı jol hám 231 kópirdi qurıw hám ońlaw, 13 mıń kilometr topıraq kóshelerge qum-shaǵıl tas tósew, 400 kilometr cement qaplamalı jollar qurıw, magistrallar boyında 72 servis kompleksin shólkemlestiriw rejelestirilgen.
Prezentaciyada juwapkerler usılar haqqında málimleme berdi.
Jańa joybarlardı belgilewde jollardıń házirgi jaǵdayına hám qatnaw dárejesine itibar qaratılmaqta. Búgingi kúnde xalıqaralıq qarjı shólkemleri menen birgelikte 1 mıń 200 kilometr joldı rekonstrukciyalaw boyınsha 6 iri joybar ámelge asırılmaqta.
Jáne 4 joybardıń baslanıwı názerde tutılǵan. Atap aytqanda, Tórtkúl hám Beruniy qalaların aylanıp ótiwshi A-380 magistralın rekonstrukciyalaw, Qaraqalpaqstan hám Xorezmde 516 kilometr jergilikli jollardı tolıq ońlaw, Termiz – Denau jáne Sırdárya – Baxıt aralıǵındaǵı jollardı cement-beton qaplamalı etip qurıw rejelestirilgen. Bul joybarlarǵa Aziya rawajlanıw banki, Jáhán banki, Islam rawajlanıw banki hám Aziya infrastrukturalıq investiciyalar bankiniń qarjıları qaratıladı.
Mámleketimiz basshısı eń áhmiyetli másele jollardı sapalı saqlaw ekenin atap ótti. Jol boylarında infrastrukturanı rawajlandırıp, xalıqqa qolaylıqlar jaratıw boyınsha tapsırmalar berildi.
Qamchiq ótkelinde stacionar qadaǵalaw postı iske qosılǵan. Onı júk tasıw aǵımı joqarı bolǵan basqa jollarda da shólkemlestiriw zárúr ekenligi atap ótildi.
Usı jerde bunnan derlik 20 jıl burın qabıl etilgen “Avtomobil jolları haqqında”ǵı nızam házirgi zaman talaplarına juwap bermey atırǵanın aytıw kerek. Keyingi jıllardaǵı reformalar, búgingi áhmiyetli máseleler onda kórsetilmegen.
Sonlıqtan bul nızam jańa redakciyada islep shıǵılmaqta. Onda, sonıń ishinde, “avtomobil jolların rejelestiriw” mexanizmin engizip, jol infrastrukturasın xalıq hám ekonomikanıń ósip baratırǵan talaplarına muwapıq rawajlandırıw názerde tutılmaqta. Jollardı joybarlastırıwda xalıqtıń pikiri hám qorshaǵan ortalıqqa tásirin esapqa alıw jáne piyadalar ushın tosqınlıqsız ortalıqtı jaratıw boyınsha qatań talaplar ornatılmaqta. Kommunikaciya tarmaǵın qurıwda joldıń burınǵı jaǵdayın tiklew qárejetlerin qaplaw shárti kirgizilmekte.
Tólemli jollardıń huqıqıy tiykarları, ajıratılǵan hám jol boyı aymaqlarında servis imaratların jaylastırıwǵa baylanıslı talaplar belgilenbekte. Jollarda úlken kólemli hám awır salmaqlı transport qurallarınıń háreketi tártipke salınbaqta.
Prezentaciyada juwapkerler alternativ jollar qurıw boyınsha jeke menshik sheriklik joybarları boyınsha da esabat berdi.

ÓzA