Búgingi balalardı ápiwayı multfilm qaharmanları menen tań qaldırıw júdá qıyın. Olardı búgin qoyannıń izinen juwırıp júretuǵın qasqır, apasına jamanlıq etetuǵın Qımbattıń waqıyaları menen jubatıp bolmaydı.
Olar mobil qurılmalar arqalı efirge berilip atırǵan multfilmlerge mehir qoyıp úlgerdi. Endi olardı joqarı tezliktegi háreketli, ráńbáreń súwretlerge bay animaciyalıq kórinistegi multseriallar qızıqtıradı. Qullası, búgingi dóretiwshiler talapqa qarap usınıs penen islemese, balalar ushın qızıqlı dóretiwshilik úlgileri jaratılmasa kishkene ıqlasbentlerdi ekran aldına jaqınlastırıw qıyın.
Sol sebepli elimizdiń kinodóretiwshileri animaciyalıq kórinistegi multfilmlerdi jaratıw, olardı kóbeytiw ushın izleniwler alıp barmaqta, birge islesiw baylanısların jolǵa qoymaqta.
Sanlı texnologiyalar ministri Sherzod Shermatov Yaponiyanıń Osaka qalasında ” Uzbekistan Outsourcing Session ” ilajı sheńberinde belgili yapon animaciyalıq studiyası – “Gainax Kyoto”nıń tiykarın salıwshılarınıń biri, animaciya tarawı qánigesi Takeda Yasuxiro” hám “Kyoto Computer Gakuin” kompaniyasınıń prezidenti Yoochi Terashita hám “Gainax” kompaniyasınıń prezidenti Takeda Yosuxiro menen ushırasıw ótkerdi.
35 jıldan aslam waqıt dawamında bul tarawda jumıs alıp barıp atırǵan Takeda Yaponiya animaciya sanaatınıń rawajlanıwına úlken úles qosqan hám kóplegen maman qánigelerdi jetistirip shıǵarǵan.
Sáwbet dawamında Takeda usı háptede Ózbekstanda bolıp ótetuǵın “Game Fest” kórgizbesinde qatnasıp, ilaj sheńberinde oyın hám animaciya sanaatın rawajlandırıwǵa baǵıshlanǵan sabaqlar hám dodalawlarda qatnasıwdı rejelestirgenin bildirdi.
Sonday-aq, “Kyoto Computer Gakuin” kompaniyası prezidenti Yoochi Terashita hám “Gainax” kompaniyası prezidenti Takeda Yosuxiro menen ushırasıwda IT tarawında bilimlendiriwdi kúsheytiw, kreativ industriyanı rawajlandırıw, yapon tili hám IT kursların shólkemlestiriw sıyaqlı bir qatar máseleler de dodalaw orayında boldı.
Ushırasıw juwmaǵında tárepler Ózbekstan hám Yaponiya arasında animaciya hám sanlı dóretiwshilik tarawlarında kadrlar tayarlaw, bilim hám tájiriybe almasıwdı óz ishine alǵan birge islesiwdi jolǵa qoyıw boyınsha kelisimge eristi.
N.Rahmonova, ÓzA