Oliy Majlis Nızamshılıq palatasınıń májilisinde bir topar deputatlar tárepinen nızamshılıq baslaması huqıqı tiykarında islep shıǵılǵan “Ózbekstan Respublikasınıń ayırım nızam hújjetlerine parlamenttegi oppoziciyanıń kepillengen huqıqların keńeytiwge qaratılǵan ózgerisler hám qosımshalar kirgiziw haqqında”ǵı nızam joybarı ekinshi oqıwda statyama-statya kórip shıǵıldı.
– Bul nızam joybarı parlamenttegi oppoziciyanıń huqıqların keńeytiwge qaratılǵan, – dedi deputat N.Umarov. – Joybar menen Ózbekstan Respublikasınıń ayırım nızam hújjetlerine ózin parlamenttegi oppoziciya, dep járiyalaǵan siyasiy partiya frakciyasına nızam joybarı ekinshi oqıwda kórip shıǵılǵanǵa shekem sol máselege baylanıslı nızam joybarın, sonday-aq, Oliy Majlis Nızamshılıq palatası qararı joybarınıń alternativ redakciyasın kirgiziw názerde tutılmaqta.
Sonday-aq, Oliy Majlis Nızamshılıq palatasınıń bir komitet baslıǵı hám eki komitet baslıǵınıń orınbasarı lawazımların kepillikli iyelew, hár sherekte “Húkimet saatı” sheńberinde jáne parlamentlik sorawdı jiberiw haqqında keminde bir másele kirgiziw sıyaqlı qosımsha huqıqlar beriwdi názerde tutatuǵın ózgerisler hám qosımshalar kirgizilmekte.
Nızam joybarın ekinshi oqıwǵa tayarlaw procesinde juwapker komitet tárepinen bir qatar jumıslar ámelge asırıldı. Deputatlar bergen pikir-usınıslardan kelip shıǵıp, olar tiykarında hújjettiń teksti jetilistirildi. Nızam joybarınıń qabıl etiliwi parlamentte hár qıylı kózqaraslar, pikirlerdiń hár túrliligin kúsheytip, onıń ideyalar generatorına aylanıwında áhmiyetli faktor boladı, – dedi bayanatshı.
Statyama-statya dodalawlarda bir qatar usınıslar bildirildi. Bunnan soń nızam joybarı ekinshi oqıwda qabıl etildi.
Muhtarama Komilova, ÓzA