2025-jıl 12-may kúni Oliy Majlis Senatınıń Baslıǵı Tanzila Norboeva Evropa Awqamınıń Oraylıq Aziya boyınsha arnawlı wákili Eduards Stiprays penen ushırasıw ótkerdi.

Ushırasıwda Ózbekstan hám Evropa Awqamı arasındaǵı parlamentleraralıq birge islesiw máseleleri dodalanıp, bul baylanıslardı jańa basqıshqa alıp shıǵıw zárúr ekenligi atap ótildi. Tárepler áhmiyetli regionallıq hám globallıq máseleler boyınsha pikir alısıw, sonday-aq, tájiriybe hám málimlemeler menen óz-ara bólisiwdi dawam ettiriwge tayar ekenin bildirdi.

Sóylesiw waqtında Samarqand qalasında bolıp ótken “Oraylıq Aziya – Evropa Awqamı” birinshi sammitiniń áhmiyeti ayrıqsha atap ótildi. Bul sammit eki region arasında óz-ara isenim hám turaqlı qarım-qatnastı bekkemlewde áhmiyetli tiykar bolǵanı atap ótildi. Bunday ushırasıwlar siyasiy, ekonomikalıq hám mádeniy baǵdarlarda birge islesiwdi tereńlestiriwge xızmet etip atırǵanı atap ótildi.
Sonday-aq, Tashkent qalasında 2025-jıl aprel ayında tabıslı ótkerilgen Parlamentleraralıq awqamnıń 150-yubiley assambleyası sheńberinde Evropa mámleketleri parlamenti wákilleriniń belsene qatnasqanı joqarı bahalandı. Assambleya sheńberinde qabıl etilgen hújjetlerdiń Evropa Awqamı tárepinen qollap-quwatlanǵanı bul birge islesiwde joqarı dárejedegi siyasiy erk-ıqrar bar ekenligin kórsetti.
Tárepler siyasiy sóylesiwdi izbe-iz dawam ettiriw, nızamshılıq procesinde aldınǵı kózqaraslardı almasıw, parlamentleraralıq baylanıslardı bekkemlew hám óz-ara sapar etiwlerdiń jedelligin arttırıw baǵdarındaǵı háreketlerdi kúsheytiwge kelisip aldı. Ushırasıw doslıq hám konstruktivlik ruwxta ótti.

Qaraqalpaqstan xabar agentligi