Rossiya prezidenti Vladimir Putin Ukraina húkimeti menen tikkeley tınıshlıq sóylesiwlerin baslaw usınısı menen shıqtı. Bul haqqında ” France 24″ basılımı málim etpekte.

Tárepler arasındaǵı sóylesiw 15-may kúni Túrkiyanıń Stambul qalasında ótkeriliwi múmkin.
Rásmiy Kreml óz bildiriwinde Rossiya sóylesiwlerdi “qarama-qarsılıqtı toqtatıw jolındaǵı real imkaniyat” dep bahaladı. Putin Túrkiya jetekshisi Rejep Tayyip Erdoǵan menen baylanısıp, dodalawlar ushın Stambuldı dáldalshılıq maydanına aylandırıwdı soraǵan.
Ukraina basshısı Vladimir Zelenskiy RFnıń bul usınısın dıqqat penen kórip shıǵatuǵının málim etti. Sonday-aq, ol 12-maydan baslap 30 kúnlik shártsiz tınıshlıq járiyalawdı usınıs etti. Ukraina tárepiniń poziciyasına bola, hár qanday sóylesiwden aldın áskeriy háreketlerdi waqtınsha toqtatıw zárúr.
Zelenskiy kelisimdi sóylesiwlerdiń baslanıwı ushın áhmiyetli shárt dep atadı hám Rossiyanıń múnásibetin kútip atırǵanın ayttı.
Itibarlı tárepi, Vashington bul jaǵdayǵa jedel múnásibet bildirdi. AQSh prezidenti Donald Tramp Ukraina tárepin sóylesiwlerde qatnasıwǵa shaqırdı. Ol bul sóylesiwdi tartıstı saplastırıw ushın “úlken imkaniyat” dep bahalamaqta.
Óz gezeginde, Evropa mámleketleri de tınıshlıq baslamasın dıqqat penen baqlamaqta. Germaniya, Franciya, Polsha hám Ullı Britaniya basshıları Rossiyanı 30 kúnlik shártsiz kelisimge shaqırdı. Eger Rossiya bul usınıstı biykar etse, EA jańa sankciyalardı kórip shıǵatuǵının bildirdi.
Xalıqaralıq ekspertlerdiń pikirinshe, bul diplomatiyalıq háreketler urıs baslanǵanınan berli eń sezilerli baslama sıpatında atap ótilmekte.

M.Sayfullaev, ÓzA