Nókis qalasında «Qorshaǵan ortalıqtı qorǵaw hám jasıl ekonomika» jılı sheńberinde shólkemlestirilgen «Eco – Save Aral-2025» hám «Insan ushın» atamasındaǵı xalıqaralıq qayırqomlıq hám ekologiyalıq ǵalabalıq juwırıw jarısı bolıp ótti.

Jarısta joqarı oqıw orınlarınıń studentleri, ulıwma bilim beriw mektepleriniń oqıwshıları, áskeriy xızmetkerler, mayıplıǵı bolǵan puqaralar, sonday-aq, 7 jastan 70 jasqa shekemgi xalıq wákilleri belsene qatnastı.
Qızıqlı ótken jarıslar juwmaǵında, áskeriy xızmetkerler arasında birinshi orındı S.Tlewimbetov, studentler arasında E.Bazarbaeva, oqıwshılar arasında B.Kenjebaev hám ápiwayı xalıq wákilleri arasında S. Shukurullaeva jeńip alıwǵa miyasar boldı.
-Bul ilajdı ótkeriwden tiykarǵı maqset – ekologiyalıq turaqlılıq, salamat turmıs tárizin úgit-násiyatlaw, turaqlı keleshekke birgelikte háreket etiw, qorshaǵan ortalıqtı qorǵaw hám sport penen turaqlı shuǵıllanıwǵa baǵdarlawdan ibarat boldı,-deydi Qaraqalpaqstan Respublikası Sport ministrligi bólim baslıǵı Ikram Qudiyarov.
Sonday-aq, jarıs sońında fizikalıq imkaniyatı sheklengen puqaralar, jarısta sıylı orınlardı iyelegenler hám jası úlken nuraniyler de shólkemlestiriwshiler tárepinen tayarlanǵan arnawlı diplom hám estelik sawǵalar menen sıylıqlandı.

Adilbay Orazov,
Qaraqalpaqstan xabar agentligi sholıwshısı