2025-jıl 12-may kúni Samarqand qalasında Ózbekstan Respublikası Oliy Majlisi hám Qırǵız Respublikası Jogorku Keneshi arasında birge islesiw boyınsha parlamentleraralıq komissiyanıń besinshi májilisi bolıp ótti. Májiliste eki mámleket arasındaǵı qatnasıqlardıń búgingi jaǵdayı hám olardı bunnan bılay da rawajlandırıw perspektivaları dodalandı. Ushırasıwda, atap aytqanda, parlamentleraralıq birge islesiwdi kúsheytiw máselesi tiykarǵı baǵdarlardan biri sıpatında belgilendi.

Tárepler sawda-ekonomikalıq baylanıslardı keńeytiw, investiciyalardı tartıw hám mádeniy-gumanitarlıq tarawdaǵı almasıwdı kúsheytiw ushın parlament diplomatiyasınıń imkaniyatlarınan keńnen paydalanıw zárúr ekenligin atap ótti.
Komissiyanıń járdemshi baslıǵı, Oliy Majlis Senatı Baslıǵınıń birinshi orınbasarı Sodiq Safoev eki mámleket basshılarınıń jaqın jıllarda alıp barǵan jumısı sebepli siyasiy isenim bekkem tiykarǵa iye bolǵanın atap ótti. Sonday-aq, parlamentler mámleketleraralıq baylanıslardıń strategiyalıq rawajlanıwına xızmet etiwi kerek ekenligi atap ótildi.
Ushırasıwda nızam dóretiwshiligi tarawında tájiriybe almasıw, jaslar menen islesiw, sociallıq hám mádeniy joybarlardı qollap-quwatlaw sıyaqlı máselelerge de ayrıqsha itibar qaratıldı. Ulıwma tariyxıy hám mádeniy miyrastı qásterlep saqlaw, bilimlendiriw tarawındaǵı birge islesiwdi kúsheytiw hám gumanitarlıq tarawdaǵı baylanıslardı bunnan bılay da rawajlandırıw boyınsha pikir alısıldı.
Turizm tarawı da kún tártibinde boldı. Atap aytqanda, transshegaralıq turizm baǵdarların rawajlandırıw, turistler ushın tártiplerdi ápiwayılastırıw hám turizm infrastrukturasına investiciya kirgiziwdi xoshametlewde parlament dárejesinde járdem beriw zárúr ekenligi atap ótildi. Bul baǵdarda nızam shıǵarıwshı uyımlardıń roli ayrıqsha áhmiyetke iye ekeni atap ótildi.
Májilis juwmaǵında parlament aǵzaları eki tárepleme birge islesiwdi tereńlestiriwge tayar ekenin bildirip, parlamentleraralıq sóylesiw bunnan bılay da jaqsı qońsıshılıq, óz-ara isenim hám xalıqlardıń máplerin qorǵaw jolında áhmiyetli qural bolıp qalatuǵınına isenim bildirdi. Ilaj sheńberinde Ózbekstan hám Qırǵızstan delegaciyalarınıń basshıları Samarqandtaǵı Kongress orayınıń Húrmetli miymanlar qıyabanında birgelikte terek egip, doslıq tımsalın jarattı.

Qaraqalpaqstan xabar agentligi