Qaraqalpaqstan Respublikası Joqarǵı Keńesiniń deputatı A.Reymov ózi saylanǵan 5-sanlı “Qoskól” saylaw okrugine qaraslı mákan puqaralar jıyınlarında jumıs alıp barıp atırǵan isbilermenler hám “máhálle jetiligi” menen ushırasıw ótkerdi.

Ushırasıwdıń tiykarǵı maqseti sońǵı jılları elimizde, atap aytqanda, Qaraqalpaqstan Respublikasında isbilermenlikti qollap-quwatlaw, jergilikli baslamalardı rawajlandırıw hám jańa jumıs orınların jaratıw boyınsha ámelge asırılıp atırǵan reformalar, sonday-aq, mámleketimiz basshısınıń baslaması menen qabıl etilgen párman hám qararlardıń mazmunın túsindiriwden ibarat boldı.
Ilaj dawamında deputat A.Reymov mámleketimiz basshısınıń Qaraqalpaqstanǵa bolǵan ayrıqsha itibarı nátiyjesinde sońǵı jılları 15 ten aslam áhmiyetli párman hám qararlar qabıl etilgenin atap ótti. Bul normativlik-huqıqıy hújjetler arqalı aymaqtı sociallıq-ekonomikalıq rawajlandırıw, infrastrukturanı jaqsılaw, xalıqtıń turmıs dárejesin arttırıw hám eń áhmiyetlisi, jergilikli isbilermenlikti keńnen qollap-quwatlaw maqset etilgen.
Deputat bul hújjetlerde isbilermenler ushın jaratılǵan keń imkaniyatlar: salıq jeńillikleri, kredit resurslarına qolaylı shártlerde kiriw, jer ajıratıw tártibiniń ápiwayılastırılıwı, mámleketlik-jeke menshik sheriklik tiykarında joybarlar baslamasın alǵa qoyıw sıyaqlı baǵdarlarǵa ayrıqsha itibar qarattı. Ushırasıw dawamında A.Reymov qatnasıwshılarǵa hár bir qarar hám pármannıń tiykarǵı bántlerin túsindirip, ámelde qalay qollanılıwı boyınsha maǵlıwmatlar berdi.
Óz gezeginde isbilermenler bar imkaniyatlardan hám olardan qanday paydalanıw boyınsha óz pikirlerin bildirdi. «Máhálle jetiligi» wákilleri bolsa aymaqta sociallıq ortalıqtı salamatlandırıw, mútáj qatlamdı qollap-quwatlaw hám jergilikli mashqalalarǵa sheshim tabıwda deputatlar menen birge islesiw áhmiyetli ekenligin atap ótti.
Ashıq hám qızǵın sáwbet túrinde ótken ushırasıwda bildirilgen hár bir usınıs hám múrájat deputat tárepinen itibarǵa alınıp, tiyisli shólkemler menen birgelikte sheshiw boyınsha ilajlar kóriliw kerek ekenligin atap ótti.

ÓzA