Nókis qalasında xalıqaralıq bilimlendiriw hám ilimiy birge islesiw baǵdarında áhmiyetli ushırasıw bolıp ótti. One Cloud akademiyasınıń qıtaylı professorı Su Yuxang Berdaq atındaǵı Qaraqalpaq mámleketlik universitetine barıp, universitet rektorı, akademik A.Reymov penen ushırastı, – dep maǵlıwmat beredi QMU Baspasóz xızmeti.

Ushırasıw waqtında eki tárep óz-ara birge islesiwdiń jańa baǵdarların dodaladı. Ilimiy izleniwler, innovaciyalıq joybarlar, bilimlendiriw procesine aldınǵı texnologiyalardı engiziw – bulardıń barlıǵı ushırasıw kún tártibinen orın aldı. Professor Su Yuxang hám universitet rektorı, akademik A.Reymov xalıqaralıq birge islesiw perspektivaları, ásirese, jaslar ushın jaratılatuǵın imkaniyatlar haqqında pikir alıstı.
Bul ushırasıwdan soń Qaraqalpaq mámleketlik universiteti rektorı Qıtaydıń Dong Win Vocational College wákilleri menen onlayn tárizde sóylesti. Bul sóylesiw dawamında qıtaylı birge islesiwshiler ózleriniń bilimlendiriw sisteması, ámeliy baǵdarlamalar hám studentler ushın jaratılǵan imkaniyatlar haqqında tolıq maǵlıwmat berdi. Olar xalıqaralıq birge islesiw sheńberinde alıp barılıp atırǵan joybarlar hám ilimiy izertlewler menen de tanıstırdı.
Tárepler keleshekte professor-oqıtıwshılar hám studentler almasıwı, birgeliktegi izertlewler hám innovaciyalıq ámeliy joybarlardı jolǵa qoyıwǵa kelisip aldı. Bunday baslamalar, álbette, tek eki joqarı oqıw ornı emes, al Ózbekstan hám Qıtay arasındaǵı bilimlendiriw baylanısların jańa basqıshqa alıp shıǵadı.
Sol arqalı eki mámleket jasları zamanagóy bilimler, aldınǵı texnologiyalar hám globallıq tájiriybelerdi ózlestiriw imkaniyatına iye boladı. Xalıqaralıq birge islesiw bolsa, bilimlendiriwdiń sapasın arttırıw hám básekige shıdamlı kadrlar tayarlaw jolında áhmiyetli quralǵa aylanbaqta.

Qaraqalpaqstan xabar agentligi