Qádirli watanlaslar!

Bárinen burın, siz, ázizlerdi, kóp milletli pútkil xalqımızdı qutlı áyyyam- Eslew hám qádirlew kúni hám Ekinshi jer júzilik urısta erisilgen ullı Jeńistiń 80 jıllıǵı menen shın kewlimnen qutlıqlap, bársheńizge ózimniń joqarı húrmetim hám jaqsı tileklerimdi bildiriwden baxtıyarman.
Mine, usı tolqınlandırıwshı, sonıń menen birge, awır kúnlerde insaniyattı fashizm bálesinen qutqarıwǵa múnásip úles qosqan qaharman ata-babalarımızdı eslep, olardıń jarqın esteligi aldında bas iyemiz.
Búgingi kúnde Jańa Ózbekstandı qurıwda altınǵa teń pátiyaları, másláhátleri menen belsene qatnasıp kiyatırǵan húrmetli urıs hám miynet veteranlarına ayrıqsha qutlıqlaw hám minnetdarshılıǵımızdı bildiremiz.
Tınısh hám abadan turmıstıń saqshıları ulıǵlanatuǵın bul jarqın áyyyamda ǵárezsizlik jıllarında Watanımızdıń azatlıǵı, xalqımızdıń tınıshlıǵın qorǵaw jolında qaharmanlarsha qaytıs bolǵan márt áskerlerimizdiń esteligine húrmet kórsetiw hámmemiz ushın hám qarız, hám parız bolıp tabıladı.
Áziz doslar!
Insaniyat tariyxındaǵı eń qorqınıshlı qırǵın bolǵan Ekinshi jer júzilik urıs dúnya xalıqları, sonıń ishinde, elimizdiń basına salǵan awır qayǵılar, sheksiz apatshılıq hám joǵaltıwlar hesh qashan umıtılmaydı.
Bul – zaman hám mákan shegarasın bilmeytuǵın haqıyqıy mártlik hám qaharmanlıq jılnaması bolıp esaplanadı.
Bunday ullı, dańqlı jeńiske múnásip úles qosqan márt xalqımız benen qansha maqtansaq ta arzıydı.
Keyingi jıllarda jankúyer ilimpaz hám qánigelerimizdiń ilimiy izleniwleri sebepli Ekinshi jer júzilik urıs tariyxınıń jańa betleri menen tanıspaqtamız.
Hújjetlerdiń kórsetiwinshe, fashizmge qarsı qanlı sawashlarda sol waqıtta 6 million 800 mıńdı quraǵan xalqımızdıń derlik 2 millionı qatnasqan. Sonnan 540 mıńǵa shamalası qaytıs bolǵan, 158 mıńı biydárek joǵalǵan, 50 mıńnan aslamı konclagerlerde misli kórilmegen qıynaw hám azaplar sebepli qaytıs bolǵan, 60 mıńnan aslamı mayıp bolıp qaytqan.
Ózbekstanlı ásker hám oficerlerden 214 mıńǵa shamalası jawıngerlik orden hám medallar menen sıylıqlanǵanı, 301 i Sovet Awqamı Qaharmanı degen joqarı ataqqa, 70 ten aslamı úsh dárejedegi “Dańq” ordenine miyasar bolǵanı, álbette, elimiz wákilleri tárepinen urıs maydanlarında kórsetilgen mártliktiń joqarı ámeliy tán alınıwı bolıp esaplanadı.
Mámleketimiz urıs jıllarında fronttıń bekkem támiynat bazasına aylanǵanı, respublikamızdan sawash maydanlarına oǵada úlken muǵdarda áskeriy texnika, qural-jaraq, dári-dármaq, kiyim-kenshek, azıq-awqat hám basqa da zárúr ónimler jetkerip berilgeni sol qayǵılı dáwirdiń jáne bir umıtılmas betin quraydı.
Urıs otı astında qalǵan aymaqlardan elimizge 170 ten aslam zavod hám fabrika kóshirip alıp kelindi, qısqa múddette 280 jańa kárxana qurıldı.
Xalqımız oǵada awır hám qıyın sharayatta urıs aymaqlarınan úlkemizge alıp kelingen 1 million 500 mıńǵa shamalas adamdı, sonıń ishinde, ata-anasınan ayırılǵan 250 mıń jetim balanı qushaǵına alıp, olarǵa mehir-múriwbet kórsetti.
Tariyx kitabına mórlengen bunday mısallardı búgin jáne bir márte eske alar ekenbiz, hár qanday jaǵdayda da insanıylıq isenimine sadıq qalǵan ullı hám keńpeyil xalqımızdıń ullı gumanistlik pazıyletlerine alǵıs aytamız.
Qádirli watanlaslar!
Sońǵı jıllarda qaharman ata-babalarımızdıń ómiri hám isleri, mártligi hám jigerliligin tereń úyreniw hám úgit-násiyatlaw, jas áwladtı olardıń dańqlı dástúrleri ruwxında tárbiyalaw boyınsha kóp jumıslardı ámelge asırmaqtamız.
Bul baǵdarda Tashkent qalasında qurılǵan Jeńis parki, aymaqlardaǵı “Vatanparvar” parkleri áhmiyetli rol atqarmaqta. Bul teberik orınlar qısqa múddette barlıq watanlaslarımız hám sırt elli miymanlar ushın qutlı zıyarat orınlarına aylandı.
Mine, usınday iygilikli islerimizdiń dawamı sıpatında Jeńis parki aymaǵında ana jurt qalqanları húrmetine qurılǵan jáne bir tariyxıy estelik – Millet pidayıları kompleksi de, álbette, oǵada úlken áhmiyetke iye.
Júzlegen qaytıs bolǵan bahadır áskeriy xızmetkerler hám huqıq qorǵaw uyımları xızmetkerleriniń atları altın háripler menen mórlep qoyılǵan bul sawlatlı kórkem estelik elimiz shın kewilden umtılatuǵın hám maqtanatuǵın jáne bir ullı orın bolıp qalatuǵınına isenemen.
Húrmetli doslar!
Búgingi kúnde “Insan qádiri ushın, insan baxtı ushın” degen jaqsı ideyalar turmısımızǵa barǵan sayın tereń kirip barmaqta.
Bıyıl Ekinshi jer júzilik urıs qatnasıwshıları hám mayıplarına 10 mıń AQSh dolları muǵdarında, usı kategoriyaǵa teńlestirilgen shaxslarǵa 25 million sum, miynet frontı qatnasıwshılarına 3 million sumnan bir mártelik aqshalay sıylıqları hám “Ekinshi jer júzilik urıstaǵı jeńistiń 80 jıllıǵı” yubiley medalları tapsırılǵanı húrmetli nuranıylarımızǵa itibar hám ǵamxorlıqtıń jáne bir ámeliy kórinisi boldı.
Urıs veteranları hám mayıpları ushın medicinalıq hám sociallıq xızmetler, sonıń ishinde, patronaj xızmeti kórsetilmekte. Olar óz qálewleri boyınsha, sanatoriylerde emlenbekte.
Usı quwanıshlı kúnlerde xalqımız húrmetli kekselerimiz, urıs hám miynet veteranların zıyaratlap, olardıń pátiyasın almaqta.
Tiyisli ministrlikler, uyımlar hám shólkemler, áskeriy bólimlerdiń basshıları qatnasıwında urıs hám miynet veteranları, ǵárezsizlik jıllarında xızmet wazıypasın orınlaw waqtında qaytıs bolǵan áskeriy xızmetkerler hám huqıq qorǵaw uyımları xızmetkerleriniń shańaraq aǵzalarınıń halınan xabar alınıp, olarǵa zárúr járdem kórsetilmekte.
Álbette, biz búgingi tınısh, azat hám erkin turmıs ushın óziniń áziz janın ayamastan gúresken usınday pidayı insanlardıń aldında hár qashan qarızdarmız. Olar bunnan bılay da mámleketimiz hám jámiyetimizdiń mehir, itibarın sezinip jasaydı.
Áziz hám húrmetli watanlaslar!
Házirgi qıyın hám qáwip-qáterli zamanda jaslarımızdı bárkamal insanlar etip tárbiyalaw, elimizdegi tınıshlıq hám turaqlılıqtı, milletler hám dinleraralıq tatıwlıqtı saqlaw jolında qaharman ata-babalarımızdıń Ekinshi jer júzilik urıs jıllarında kórsetken sabır-taqatı biz ushın bárqulla ibrat mektebi, kúsh hám ilham dáregi bolıp xızmet etedi.
Bul umıtılmas áyyyamda siz, ázizlerdi, húrmetli veteranlarımızdı, pútkil xalqımızdı jáne bir ret qızǵın qutlıqlap, bársheńizge densawlıq, baxıt hám áwmet, shańaraqlarıńızǵa qut bereket tileymen.
Elimiz tınısh, xalqımız aman bolsın!

Shavkat MIRZIYoEV,
Ózbekstan Respublikası Prezidenti