9-may–«Eslew hám qádirlew kúni» hám Ekinshi jer júzilik urısta erisilgen jeńistiń 80 jıllıǵı múnásibeti menen Qaraózek rayonındaǵı «Hásiretli ana» esteligi maydanında bayram ilajı bolıp ótti.

Ilajda rayon hákimi Anvar Baymuratov jıynalǵanlardı bayram menen qutlıqlap, urıs maydanlarınan qaytpaǵan, usı tınısh zaman kúnlerge jetip kele almaǵan áziz insanlardı eske aldı hám miynet frontında qatnasqanlarǵa ǵamqorlıq kórsetiw, olardı hár tárepleme qollap-quwatlawǵa ayrıqsha itibar qaratılıp atırǵanlıǵın atap ótti.
Sońınan ekinshi jer júzilik urısta qurban bolǵanlardıń esteliklerine keń jámiyetshilik wákilleri tárepinen gúlsheńberler qoyılıp, olarǵa húrmet kórsetildi.
Sonday-aq, usı kúni Ózbekstan Respublikası Prezidentiniń 2025-jıl 9-may – «Eslew hám qádirlew» kúnin múnásip ótkeriw, Ekinshi jer júzilik urıstaǵı jeńistiń 80 jıllıǵı hám Watan qorǵaw jolında mártlershe gúresken puqaralardı ulıǵlaw maqsetinde qabıl etilgen qararı tiykarında, Qaraózek rayonı hákimi Anvar Baymuratov rayondaǵı front artında miynet etken nuranıy analarımızǵa yubiley medalları menen aqshalay sıylıqların saltanatlı túrde tapsırdı.
Jası úlkenlerge kórsetilip atırǵan bunday joqarı itibar, xalqımızdıń joqarı mánawiyatınıń ayqın kórinisi bolıp esaplanadı.

Qaraqalpaqstan xabar agentligi