Pútkil insaniyat tariyxında óshpes iz qaldırǵan Ekinshi jer júzilik urıs aqıbetleri aradan 80 jıl ótse de xalqımızdıń júreginde máńgi saqlanıp qalǵan. Kimdi ákeden, kimdi perzentinen, kimdi aǵa menen iniden, kimdi ómirlik joldasınan ayırǵan bul urıs aqıbetleri xalqımızdı búgingi tınıshlıq zamanımızǵa shúkirshilik etip jasawǵa shaqıradı.

Mámleketimizde «Insan qádiri ushın» principi tiykarında alıp barılıp atırǵan keń kólemli ibratlı isler qatarında 9-may «Eslew hám qádirlew kúni» hár jılı keń túrde belgilenip, Ekinshi jer júzilik urıs qatnasıwshıları menen front artında xızmet etkenlerdiń jeńis ushın etken xızmetlerin múnásip bahalap, olardıń jaǵdaylarınan xabar alıw hám eslew keń túrde dástúrge aylanǵan. Sonday-aq, orınlarda bayram ilajları ótkerilip, urıs qatnasıwshılarınıń húrmetine islengen estelik orınlarına gúller qoyılmaqta.
Usınday ilajlardıń biri Xojeli rayonı orayındaǵı «Hásiretli Ana» esteligi aldında da bolıp ótti. 9-may «Eslew hám qádirlew kúni» hám Ekinshi jer júzilik urısta erisilgen jeńistiń 80 jıllıǵı múnásibeti menen ótkerilgen bayram saltanatına rayon hákimi J.Ermashev, respublikadan biriktirilgen wákiller, rayondaǵı kárxana, mákeme, huqıq qorǵaw uyımları hám 28 máhálle belsendileri qatnastı. Ilajda áwladlar keleshegi ushın janın pidá etken batırlarımız eske alınıp, olardıń húrmetine gúl sheńberler qoyıldı.
Saltanatlı keshe rayonlıq Mádeniyat bólimi xızmetkerleri hám mektep oqıwshıları atqarıwında koncert baǵdarlaması menen dawam etti.

Qaraqalpaqstan xabar agentligi