Búgin internet hám sociallıq tarmaqlar turmısımızdıń ajıralmas bólegine aylanıp úlgerdi. Bul media álemi insanlardıń informaciyaǵa bolǵan talabın jedel qanaatlandırıw, waqıya-hádiyselerden xabardar bolıw, jámiyettegi áhmiyetli mashqalalardı dodalawda áhmiyetli qural bolmaqta. Mine, usınday sharayatta onlayn-platformalar paydalanıwshılarınıń huqıqları menen nızamlı máplerin nızam tiykarında anıq bekkemlep qoyıw, puqaralardı jalǵan málimlemeden qorǵaw úlken áhmiyetke iye.

Málimleme hám ǵalaba kommunikaciyalar agentligi wákilleri tárepinen bir qatar mámleketlik hám jámiyetlik shólkemler, media tarawı ekspertleriniń qatnasıwında tarawdı tártipke salıwshı tikkeley ámel etetuǵın bir pútin nızam joybarı islep shıǵıldı.
Joybardıń maqseti – puqaralardıń onlayn-platformalar hám veb-saytlardan paydalanıw tarawındaǵı huqıqların nızam dárejesinde belgilew, olardı jalǵan málimleme, ǵázep oyatatuǵın, zorlıq-zombılıq hám miyrimsizlikti úgit-násiyatlawshı nızamsız kontentten qorǵawdan ibarat. Onda onlayn-platformalar tarawındaǵı ámeldegi nızamshılıq sezilerli dárejede liberallastırılıp, tártipke salıwdaǵı ámeldegi boslıqlardı saplastırıwǵa qaratılǵan bir qatar normalar názerde tutılǵan. Sonday-aq, nızam joybarında inflyuenser hám blogerlerdiń juwapkershiligi ajıratılıp, blogerlerdiń minnetlemeleri sezilerli jeńilletilmekte.
Hújjet joybarındaǵı normalar onlayn-platformalar paydalanıwshılarınıń huqıqların nızam dárejesinde bekkemlew, Internet tarmaǵında málimleme tarqatıw tártipleri boyınsha huqıqıy anıqlıq hám izbe-izlikti támiyinlew, onlayn-platformalar hám veb-sayt iyeleri ushın Ózbekstanda jumıs alıp barıwdıń anıq shártlerin belgilew, olardıń biznes modelleri ushın sharayatlardı anıq boljaw imkaniyatın jaratıwǵa xızmet etedi. Sonday-aq, málimleme tarawı qatnasıwshıları, sonıń ishinde, onlayn-platformalar, blogerler, inflyuenserler hám tarawdı tártipke salıwshı mámleketlik uyımlar arasında óz-ara baylanıs hám konstruktivlik birge islesiw ushın huqıqıy tiykarlardı jetilistiredi. Internetten paydalanıw qáwipsizligi dárejesin arttırıw, balalardıń densawlıǵına qáwip tuwdırıwshı málimlemeden qorǵaw boyınsha anıq mexanizmlerdi jaratadı.
Bul nızam joybarı parlamenttiń tómengi palatasınıń Innovaciyalıq rawajlanıw hám málimleme texnologiyaları máseleleri komiteti tárepinen Málimleme hám ǵalaba kommunikaciyalar agentligi hám media tarawı ekspertleriniń qatnasıwında dodalanıp, onı jámiyetlik dodalawǵa qoyıw boyınsha juwmaqqa kelindi.

ÓzA