Kúni keshe Germaniya siyasiy turmısında áhmiyetli waqıya júz berdi. Mámlekettiń jańa Kancleri sıpatında Fridrix Merc jumıs basladı. Onıń siyasiy tájiriybesi hám ekonomikalıq bilimi, sonday-aq, xalıqaralıq baylanıslar boyınsha alǵa qoyǵan baslamaları mámleketlerimiz arasındaǵı birge islesiwdi bekkemlewge xızmet etetuǵını kútilmekte.

Jıllar dawamında Germaniya Ózbekstannıń áhmiyetli ekonomikalıq sherigi bolıp kelmekte. Fridrix Merc basshılıǵı dáwirinde sheriklik jáne de rawajlanıw itimalı joqarı. Energetika, awıl xojalıǵı hám infrastruktura tarawlarına qánigelesken GFR kompaniyaları mámleketimizge iri investiciya kirgiziwge qızıǵıwshılıq bildirmekte. Bul ekonomikalıq turaqlılıqtı támiyinlew, jańa jumıs orınların jaratıwda úlken áhmiyetke iye.
Germaniyanıń mámleketimizdegi Ayrıqsha hám tolıq huqıqlı elshisi Manfred Xutererdiń atap ótkenindey, bilimlendiriw hám ilim tarawındaǵı baylanıslar da jedel bekkemlenbekte. Nátiyjeli birge islesiw tek ǵana eki mámlekettiń rawajlanıwına emes, al regionallıq turaqlılıqqa da úles qosadı. Bir sóz benen aytqanda, Ózbekstan-Germaniya qatnasıqları jańa basqıshqa kóteriletuǵını sózsiz.

ÓzA