Xalqımız ásirler dawamında elimizdi, onıń azatlıǵın, paraxat turmısın qaharmanlıq penen qorǵaǵan Watanlaslarımızdı húrmetin este saqlap, bul sáneni saltanatlı túrde belgilep kelmekte.

Taxtakópir rayonında «9-may – Eslew hám qádirlew kúni» hám Ekinshi jer júzilik urısta erisilgen jeńistiń 80 jıllıǵı múnásibeti menen bayram ilajı bolıp ótti.
Ilajǵa rayon hákimi Jambul Adilov, deputatlar, qorǵanıw bólimi xızmetkerleri, miynet veteranları, Awǵanstan jerinde áskeriy minnetin orınlaǵan jawıngerler hám keń jámiyetshilik wákilleri qatnastı. Olar rayon orayındaǵı «Sheyitler esteligi»ne gúl qoyıp, el-jurt tınıshlıǵı jolında janın pidá etken ata-babalarımızdı húrmet penen eske aldı.
Bunnan soń rayon hákimi Jambul Adilov hám basqalar sózge shıǵıp, urıs hám onnan keyingi jıllarda pidákerlik penen miynet etken veteranlarımızdı usı dańqlı sáne menen qutlıqlap, olardıń ómir jolı búgingi áwlad ushın úlgi ekenligin atap ótti.

Qaraqalpaqstan xabar agentligi