Ájiniyaz atındaǵı Nókis mámleketlik pedagogikalıq institutında “Gender teńligi hám hayal-qızlardıń saylawdaǵı ornı” atamasında seminar bolıp ótti. Ilaj Ózbekstan Ekologiyalıq partiyası Qaraqalpaqstan Respublikası partiya shólkemi Keńesi, “Ekologiya hám salamatlıq” hayal-qızlar klubı hám Qaraqalpaqstan Respublikası Ádillik ministrligi menen birgelikte shólkemlestirildi, – dep maǵlıwmat beredi NMPI Baspasóz xatkeri I.Mátekov.

Seminardıń tiykarǵı maqseti – hayal-qızlardıń huqıqları menen máplerin qorǵaw, jámiyette gender teńligin úgit-násiyatlaw, sonıń menen birge, puqaralardıń usı máselelerge baylanıslı bilim hám túsiniklerin jáne de arttırıwdan ibarat.
Ilaj dawamında mámleketimizde gender siyasatı boyınsha ámelge asırılıp atırǵan reformalar, hayal-qızlardıń siyasiy hám jámiyetlik turmısta belsene qatnasıwı máseleleri keńnen sáwlelendirildi. Atap aytqanda, 2024-jılı bolıp ótken saylawlardıń nátiyjesine bola, Senatta hayal-qızlardıń úlesi 27 procentke, Nızamshılıq palatasında 38 procentke, jergilikli Keńeslerde bolsa 32,5 procentke jetkeni atap ótildi.
Seminar qatnasıwshıları usı hám basqa da áhmiyetli maǵlıwmatlar menen tanısıw menen bir qatarda, ózlerin qızıqtırǵan sorawlarǵa taraw qánigelerinen hár tárepleme juwap aldı.
Bul ilaj hayal-qızlardıń belsendiligin arttırıw hám gender teńlikti támiyinlew jolında áhmiyetli qádem bolıp xızmet etti.

Qaraqalpaqstan xabar agentligi