Elimizde Olimpiada háreketin jańa basqıshqa alıp shıǵıwda aymaqlarda ámelge asırılatuǵın jumıslardıń ornı sheksiz.
Ózbekstan Respublikası Prezidenti, Milliy Olimpiada komitetiniń baslıǵı Shavkat Mirziyoevtiń basshılıǵında 13-fevral kúni ótkerilgen videoselektor májilisinde tarawda isleniwi kerek bolǵan bir qatar áhmiyetli wazıypalar belgilep berilgen edi.

Bul wazıypalardıń orınlanıwında nátiyjelilikke erisiw maqsetinde Milliy Olimpiada komiteti janında aymaqlıq bólimlerdiń jumısı jolǵa qoyılmaqta. Sport ministrligi hám Milliy olimpiada komiteti basshılarınıń qatnasıwında aymaqlıq bólim wákilleri menen ótkerilgen ushırasıwda aymaqlarda Olimpiada háreketin rawajlandırıwǵa baylanıslı tiykarǵı wazıypalar, olardıń orınlanıwı hám infrastrukturalıq mashqalalar kórip shıǵıldı.
Dodalawlar procesinde aymaqlardıń jumısın kúsheytiwde AQSh, Qıtay, Yaponiya sıyaqlı dúnyanıń jetekshi mámleketleriniń aldınǵı tájiriybesin úyreniw, tallaw tiykarında anıq baǵdarlamalardı ámelge asırıw zárúrligi atap ótildi.
Qábiletli jaslarǵa óz qábiletlerin kórsetiw ushın imkaniyat jaratıw áhmiyetli ekenin ańlaǵan halda bárinen burın, trener hám qánigelerdiń bilim hám tájiriybesin arttırıw, olarda óz jumısına bolǵan talapshańlıqtı qáliplestiriw tarawdıń rawajlanıwına xızmet etetuǵını bildirildi.
Qızǵın pikirlesiw barısında qánigeler óz aymaǵında sport infrastrukturasınıń búgingi jaǵdayı, reje hám maqsetler indeksine toqtap ótti.
Hár bir aymaqlıq bólimniń jumısın nátiyjeli shólkemlestiriwde mashqala hám kemshiliklerdi tereń tallaw mexanizmlerin islep shıǵıw zárúrligi atap ótildi.

T.Rwziev, ÓzA