1921-jılı tuwılǵan Efim Petrovich Bespalov urısqa shekem Tórtkúl qalası kommunal xojalıǵı bóliminiń baslıǵı bolıp jumıs isleydi.

1942-jılı armiya qatarına shaqırılǵan ol 2-Belarussiya frontınıń 49-armiyası 364-atqıshlar polkında 45-mm toptıń(pushka) zeńberekshisi bolıp sawashlarǵa qatnasadı.
Oǵan 3-dárejeli «Dańq» ordeni 1944-jıldıń 15-iyul kúni Grodnenskiy wálayatı Pogorani awılı tusında bolǵan sawashta anıq gózlengen oqları arqalı dushpannıń artilleriyalıq baqlaw punkti, pulemyot tochkası, BTR hám «Ferdinand» atlı atıw quralın joq etkeni ushın beriledi.
Al, 2-dárejeli «Dańq» ordeni bolsa, 1944-jıldıń 10—12- avgust kúnleri Polshanıń Osovec qalası tusındaǵı sawashta dushpannıń 2 BTR, 2 júk tiyelgen avtomobili, shturmlıq quralı, 10 nan aslam dushpan áskerleri hám 6 pulemyot tochkaların joq etkeni ushın beriledi.
Sonday-aq, aǵa serjant Efim Bespalov Polshanıń CHersk qalası aymaǵında bolǵan sawashta da erlik kórsetip, piyada jawıngerler qatarında 4 pulemyot tochkasın joq etedi hám bunıń ushın 1946-jıldıń 15-may sánesinde 1-dárejeli “Dańq” ordeni menen sıylıqlanadı.
Sonıń menen birge biziń jerlesimiz 1944-jılı «Erligi ushın», «Jawıngerlik xızmetleri ushın» medalları hám «Úlgili artillerist» kókirek belgisi menen de sıylıqlanıp, urıs tamamlanǵannan soń Saratov qalasında jasap miynet etedi.

Baspasóz materialları tiykarında tayarlaǵan: Adilbay Orazov
Qaraqalpaqstan xabar agentligi