Sovetler Awqamınıń Qaharmanına teń esaplanatuǵın «Dańq» ordeniniń tolıq kavaleri Tilewmurat Utemuratov 1925-jılı Qaraózek rayonında diyqan shańaraǵında tuwıldı hám mektepte tolıq emes orta bilim alǵannan soń kolxozda jumıs isledi.

Al, 1943-jılı 18 jasqa tolǵan onı áskeriy komissariat urısqa qatnasıw ushın armiya qatarına shaqıradı. Batıs frontta sawashlarǵa kirisken Tilewmurat Utemuratov awır jaraqat alıp, 3 ay dawamında gospitalda emlenedi.
Sońınan ol jáne sawash maydanına qaytıp kelip, 3-Belarussiya frontınıń 5-armiyası 97-atqıshlar diviziyasınıń 136-polkında sapyor sıpatında qatnasıp, ele qarshaday jas bolıwına qaramastan qanlı sawashlarda óziniń batırlıǵı hám erligin kórsetti.
Atap aytqanda, qatardaǵı jawınger Utemuratov óz qurallasları menen 3 sal soǵıp Belarussiya aymaǵındaǵı Berezina dáryasın keship ótip, fashistler tárepinen áskerlerimizge duzaq sıpatında qoyılǵan 78 minanı zıyansızlandıradı hám jawıngerlerge qáwipsiz eki soqpaq jol ashıp beredi. Sońınan ol óz isin dawam etip, dárya boyında dushpannıń jáne 30 minasın zıyansızlandırıwǵa erisedi.
Tilewmurat Utemuratovtıń bul islegen erligi áskerbasshıları tárepinen múnásip túrde bahalanıp, ol 1944-jıldıń 13-sentyabrinde 3-dárejeli «Dańq» ordeni menen sıylıqlanadı.
Al, 1945-jıldıń 30-yanvar kúni Polshanıń Kaleshteyn elatlı punktinde bolǵan sawashta bolsa biziń márt jerlesimiz Tilewmurat Utemuratov 21 dushpan áskerlerin joq etiwge eristi hám bul xızmetleri ushın ol SSSR Joqarǵı Soveti Prezidiumınıń 1945-jıl 26-fevraldaǵı Pármanı menen jáne bir márte 3-dárejeli Dańq ordeni menen sıylıqlanıwǵa miyasar boladı. Bul Tilewmurattıń komandirleriniń sıylıqqa usınılǵan hújjetlerdi tayarlaw barısında jibergen qátesi edi. Sebebi, onıń kartotekasında burın sıylıqlanbaǵan degen jazıw turǵan hám sonlıqtan ol 3-dárejeli «Dańq» ordeni menen ekinshi márte sıylıqlanadı.
Óziniń batırlıǵı menen basqa qurallaslarına úlgi bolıp júrgen Utemuratovqa sonday-aq , aǵa serjant áskeriy dárejesi beriledi.
Sonıń menen birge, serjant Utemuratov óziniń mártlik islerin dawam etip, 1945-jıldıń 8-16-aprel kúnleri Zemland yarım atawında bolǵan sawashlarda jeke ózi onnan aslam dushpan áskerlerin joq etip, bir neshe oficer hám soldatların tutqınǵa alıwǵa erisedi. Ol bul erligi ushın 2-dárejeli «Dańq» ordeni menen sıylıqlanadı.
Sonday-aq, ol «Erligi ushın» medalı menen de sıylıqlanıwǵa erisedi.
1950-jılı áskeriy xızmetten bosaǵan ol Qaraózek rayonında jasap miynet etedi.
1982-jıldıń 22-yanvar kúni Tilewmurat Utemuratovtıń hújjetlerinde jiberilgen qáte-kemshilik dúzetilip, oǵan 1-dárejeli Dańq ordeni tapsırıladı hám solay etip ol Dańq ordeniniń tolıq kavalerine aylanadı.
Xalqımızdıń maqtanıshına aylanǵan márt hám qaharman jawıngerlirimizdiń biri Tilewmurat Utemuratov Qaraózek rayonında 2005-jıldıń 16-oktyabri kúni qaytıs boladı.

Baspasóz materialları tiykarında tayarlaǵan: Adilbay Orazov
Qaraqalpaqstan xabar agentligi