Mámleketimizde jaslardı joqarı bilimlendiriw menen qamtıp alıw, joqarı bilimlendiriw hám ilim tarawın rawajlandırıw jáne xalıqaralıq dárejege alıp shıǵıw, ilim wákillerin qollap-quwatlaw baǵdarında keń kólemli jumıslar ámelge asırılmaqta. «Ózbekstan-2030» strategiyasında da bilimlendiriwge ayrıqsha itibar qaratılǵan bolıp, hár jılı qabıl etilip atırǵan Mámleketlik baǵdarlamalarda usı tarawdı rawajlandırıwǵa baylanıslı anıq maqset hám wazıypalar belgilenbekte. Tarawdaǵı sistemalı háreketler nátiyjesinde búgingi kúnge kelip, bilimlendiriw tarawında turaqlı siyasat hám resurslar bazası qáliplesti.

Tashkentte Renessans bilimlendiriw universiteti tárepinen Joqarı bilimlendiriw, ilim hám innovaciyalar ministrligi menen birgelikte «Sociallıq bilimler hám texnikalıq-injenerlik túrk dúnyası» temasında xalıqaralıq simpozium ótkerildi. Bul ánjumannan gózlengen maqset – túrkiy xalıqlar arasında sociallıq-gumanitarlıq ilimler hám injenerlik-texnikalıq tarawlardıń óz-ara baylanıslılıǵın bekkemlew, ilimiy birge islesiwdi tereńlestiriw, zamanagóy innovaciyalıq kózqaraslardı almasıw jáne túrkiy dúnyanıń rawajlanıwına xızmet etetuǵın birgeliktegi ilimiy baslama hám joybarlardı alǵa qoyıwdan ibarat.
Ilajda Oliy Majlis Senatınıń aǵzaları, elimizdegi joqarı bilimlendiriw mákemeleri menen birge 12 mámleket, sonıń ishinde, Túrkiya, Qazaqstan, Qırǵızstan, Ázerbayjan hám basqa da mámleketlerdiń abıraylı universitetleriniń wákilleri qatnastı.
Bul xalıqaralıq ánjuman túrkiy xalıqlardı baylanıstıratuǵın tariyxıy, mádeniy hám intellektuallıq baylanıslardı bunnan bılay da bekkemlew jolındaǵı áhmiyetli qádemlerden biri boldı, dep aytıw múmkin. Simpozium sheńberinde injenerlik hám texnologiyalıq pánler menen sociallıq-gumanitarlıq baǵdarlardı integraciyalaw, olardı túrkiy xalıqlardıń rawajlanıwı jolında úylestiriw máseleleri keńnen dodalandı.
Ánjumanda dáslep Joqarı bilimlendiriw, ilim hám innovaciyalar ministriniń simpozium qatnasıwshılarına jollaǵan qutlıqlawı hám shıǵıp sóylegen sózi oqıp esittirildi. Ministrdiń shıǵıp sóylegen sózinde atap ótilgenindey, túrkiy dúnya mámleketleri búgingi globallasıw procesinde zamanagóy ilim, texnologiya hám injenerlik jetiskenliklerine súyengen halda rawajlanıwǵa qaray anıq umtılmaqta. Sonıń menen birge, sociallıq bilimler – tariyx, til, mádeniyat hám filosofiya birlestiriwshi ishki kúshimiz sıpatında ele de ayrıqsha áhmiyetke iye. Bul ánjuman nátiyjesinde házirgi global tendenciyalar hám sırt el tájiriybeleri boyınsha jańa bilimlerge iye bolıp, ilimiy birge islesiwdi kúsheytiw, bilimlendiriw hám ilimdi ámeliyat penen úylestiriw, keleshekte izertlewler ushın jańa baǵdarlardı belgilep alıw imkaniyatı júzege keledi.
Simpoziumda Túrkiya, Qazaqstan, Ázerbayjan sıyaqlı mámleketlderdiń bir qatar joqarı bilimlendiriw mákemeleriniń wákilleri shıǵıp sóylep, bul ánjuman túrkiy dúnya ilimpazların birlestiretuǵın ilimiy-mádeniy kópir bolatuǵını, bilimlendiriw hám ilimde óz-ara tájiriybe almasıw maydanı bolıp xızmet etetuǵını atap ótildi.
Simpozium dawamında bilimlendiriw hám ilim tarawı wákilleri bir qatar sektorlar boyınsha jumıs alıp bardı. Sonıń ishinde, sektorlarda zamanagóy jámiyette pedagogikalıq analizlew hám izertlewler, turaqlı rawajlanıwdı támiyinlewde jasıl ekonomika, sanlı texnologiyalardıń ornı hám áhmiyeti, Evroaziya regionında túrkiy mámleketler tariyxı hám mádeniyatı, sonday-aq, injenerlik, matematikalıq modellestiriw, málimleme sistemaları hám texnologiyalıq bilimler hár tárepleme dodalandı.

Muhtarama Komilova,
Doniyor Yakubov,
Uluǵbek Twxtaev (video), ÓzA