Aldın xabar berilgenindey, usı jıldıń 6-10-may kúnleri respublikalıq Jumısshı topar tárepinen puqaralardıń múrájatları hám xalıqtı qıynap kiyatırǵan mashqalalarına sheshim tabıw boyınsha orınlarda kóshpeli qabıllawlar ótkeriliwi belgilengen edi. Usı tiykarda Nókis qalasındaǵı «Mono oray» imaratında Respublika jumısshı toparı tárepinen kóshpeli qabıllaw ótkerilip, Xojeli, Nókis, Taqıyatas rayonları hám Nókis qalası turǵınlarınıń múrájatları kórip shıǵıldı.

Búgingi kúnde mámleketimizde insan mápleri joqarı qádiriyat dárejesine kóterilgen bolıp, bunda barlıq ilajlar «Insan qádiri ushın», al, iygilikli ámeller bolsa «Insan mápleri hámme nárseden ústin»-degen princip tiykarında turmısta óz sáwleleniwin tawıp atır. Onda puqaralardıń mashqalaların úyreniw hám saplastırıw, nızamlı máplerin támiyinlew jolında barlıq ilajlar kórilmekte.
Ótkerilgen qabıllawda da mine, usı princip tiykarında puqaralardıń tilek-ótinishleri, olardı qıynap atırǵan mashqalaları tıńlandı.
Qabıllawǵa óziniń mashqalaları menen 450 ge shamalas puqara kelgen bolıp, 476 másele boyınsha múrájat etti. Sonnan, 146 múrájat yaǵnıy, ulıwma 31 procenti sol orınnıń ózinde sheship berildi.
Sud-huqıq, salıq, avtomobil jolları, bántlik sıyaqlı 123 máselege tiykarlı túsinikler berilgen bolsa, múddet talap etetuǵın 207 múrájat qadaǵalawǵa alındı hám qısqa múddette orınlı sheshim tabıw boyınsha juwapkerlerge tapsırmalar berildi.

Qaraqalpaqstan xabar agentligi