Búgin 7-may kúni Ózbekstan Qaharmanı, Ózbekstan hám Qaraqalpaqstan Xalıq jazıwshısı, Berdaq atındaǵı Mámleketlik sıylıqtıń laureatı, «El-yurt hurmati», «Dwstlik» ordenleriniń iyesi Tólepbergen Qayıpbergenovtıń tuwılǵanına 96 jıl toldı.

Usı múnásibet penen T. Qayıpbergenovtıń shańaraq aǵzaları, shákirtleri hám Nókis rayonı hákimligi xızmetkerleri “Azizler Baba” qoyımshılıǵına barıp zıyarat etip, jazıwshınıń ruwxına quran oqıldı. Bunnan soń, rayondaǵı Politexnikumda jazıwshınıń tuwılǵan kúni múnásibeti menen dóretiwshilik ádebiy keshe shólkemlestirildi. Keshede sózge shıqqanlar Ózbekstan Qaharmanı, Ózbekstan hám Qaraqalpaqstan xalıq jazıwshısı Tólepbergen Qayıpbergenovtıń ómir jolı, islegen miynetleri, shıǵarmaları haqqında qatnasıwshılarǵa maǵlıwmatlar berdi.
1929-jıl 7-mayda házirgi Kegeyli rayonında Nókis rayonı aymaǵında dúnyaǵa kelgen jazıwshı óziniń bay hám jemisli dóretiwshiligi arqalı Qaraqalpaq ádebiyatınıń biyik shıńların iyelegen.
Ol dóretken «Sekretar» «Muǵallimge raxmet» «Sońǵı hújim», «Suwıq tamshı», «Qaraqalpaq qızı», «Mamanbiy ápsanası», «Baxıtsızlar», «Túsiniksizler» sonday-aq, «Qaraqalpaq dástanı» trilogiyası shıǵarmaları hám «Qaraqalpaqnama» sıyaqlı iri epikalıq shıǵarmalar ózbek hám basqa da kóplegen jáhán tillerine awdarılǵan.
Jazıwshınıń atın máńgilestiriw baǵdarında da bir qatar baslamalar ámelge asırılıp, Nókis qalasındaǵı oraylıq kóshelerden biri onıń atı menen ataladı, sonday-aq, Tashkenttegi Jazıwshılar qıyabanında jazıwshınıń esteligi boy tiklegen. Ol burınǵı Awqam mámleketlik sıylıǵınıń, sonday-aq, Mahmud Qashqariy hám Mixail Sholoxov atındaǵı xalıqaralıq sıylıqlardıń laureatı.
Tólepbergen Qayıpbergenov tek ǵana qaraqalpaq emes, al pútkil ózbek ádebiyatı tariyxında tereń iz qaldırǵan, milliy maqtanısh hám mádeniyat tımsalına aylanǵan ullı dóretiwshi.
Onıń ruwxıy miyrası biz ushın biybaha baylıq bolıp esaplanadı.

Qaraqalpaqstan xabar agentligi