Bajıxana uyımlarında xızmet etip atırǵan hayal-qızlardıń huqıqıy hám kásiplik bilimlerin arttırıw, sonday-aq, olarda basshılıq hám liderlik pazıyletlerin rawajlandırıwǵa ayrıqsha itibar qaratılmaqta. Bul process, tek ǵana xızmetkerlerdiń professional potencialın arttırıw emes, al olardıń jámiyettegi rolin bekkemlewge de xızmet etedi.

Qaraqalpaqstan Respublikası Bajıxana basqarmasında gender tiykarındaǵı zorlıq hám jınısıy zorlıqtıń aldın alıw boyınsha dógerek sáwbeti shólkemlestirildi.
Ilajda Qaraqalpaqstan Respublikası Ádillik ministrliginiń qánigesi Sh.Salieva qatnasıp, hayal-qızlardıń huqıqları boyınsha nızamshılıq hám bar resurslar haqqında tolıq maǵlıwmatlar berdi. Sonday-aq, hár qanday kórinistegi zorlıqlardıń aldın alıw boyınsha huqıqıy jaqları da atap ótildi.
Dógerek sáwbeti dawamında bul baǵdarda ámelge asırılıp atırǵan joybarlardıń prezentaciyası ótkerilip, jámiyette hayal-qızlar hám er adamlardıń teń huqıqlılıǵın támiyinlew baǵdarlamaları boyınsha pikir alısıldı.
Ilaj qatnasıwshıları óz-ara tájiriybe almasıw, mashqalalardı dodalaw hám olardı sheshiw jolların izlew imkaniyatına da iye boldı.
Bunday ilajlar, álbette, hayal-qızlardıń huqıqıy sawatlılıǵın arttırıw hám olardı belsene turmısqa tartıw jolında úlken áhmiyetke iye.

Qaraqalpaqstan xabar agentligi