«9-may-Eslew hám qádirlew kúni» múnásibeti menen Nókis qalasında Milliy gvardiyanıń Qaraqalpaqstan Respublikası basqarmasınıń atlı kavaleriyası hám Qaraqalpaqstan shabandozlar mektebi tárbiyalanıwshılarınıń qatnasıwında atlılar paradı ótkerildi.

Saltanatlı paradtı tamashalawǵa respublikamız jasları hám keń jámiyetshilik wákilleri qatnastı.
-Ózbekstan Respublikası Prezidentiniń 2021-jıl 5-avgusttaǵı 5211-sanlı qararı tiykarında elimizdiń basqa aymaqlarında bolǵanı sıyaqlı, biziń respublikamızda da at sportı rawajlanıp barmaqta,-deydi Qaraqalpaqstan shabandozlar mektebiniń direktorı Rinat Joldasov.- Atap aytqanda, 2022-jılı Nókis qalasında Qaraqalpaqstan shabandozlar mektebi shólkemlestirilip, onda házirgi waqıtta 66 jas óspirim tárbiyalanbaqta. Olarǵa 2 tájiriybeli trener tálim-tárbiya bermekte. Olar mámleketimizde ótkerilip kiyatırǵan hár qıylı jarıslarda qatnasıp, sıylı orınlardı iyelep kelmekte. Sonıń ishinde atap aytatuǵın bolsaq, 2024-jıldıń dekabr ayında Namangan wálayatında ılaq-kókparı sportı boyınsha ótkerilgen Ózbekstan kuboginde gúmis medaldı qolǵa kirgizdi. Komandamız aǵzalarınan Atabek Bazarbaev hám Orazan Jumabaevlar mámleketimiz saylandı komandası quramına qabıllanıp, olar usı jıldıń mart ayında ótkerilgen xalıqaralıq turnirde 1-2-orınlardı iyelewge eristi. Ózbekstan Respublikası Ministrler Kabinetiniń 2025-jıl 3-marttaǵı «Ulıwmaxalıqlıq bayramlar hám seyiller sheńberinde atlılar qatnasıwında paradlardı ótkeriwge tayarlıq kóriw hám joqarı dárejede ótkeriw haqqında»ǵı májilis protokolında ulıwmaxalıqlıq bayramlar hám seyillerde atlılar paradın ótkeriw belgilengen edi. Usı tapsırmanı orınlaw maqsetinde, búgingi bayramda mektebimiz tárbiyalanıwshıları Milliy gvardiyanıń Qaraqalpaqstan Respublikası basqarmasınıń atlı kavaleriyası menen birgelikte atlılar paradına qatnastı hám ózleriniń sheberliklerin kórsetti. Bizler bunnan oǵada quwanıshlımız hám aldaǵı waqıtları da xalqımızǵa óz ónerlerimizdi kórsete beremiz.
Atlılar paradın tamashalawǵa kelgen qatnasıwshılar «Eslew hám qádirlew kúni» múnásibeti menen «Hásiretli ana» esteligine de húrmet kórsetip zıyaratladı.

Adilbay Orazov,
Qaraqalpaqstan xabar agentligi sholıwshısı.