Kópshilikke belgili bolǵanınday sońǵı jılları mámleketimizde Prezidentimizdiń basshılıǵında jaslardıń oqıp bilim alıwı, kásip-óner iyelewi hám jumıs penen bántligin támiyinlew baǵdarında kóplegen unamlı jumıslar ámelge asırılıp kelinbekte.

Ózbekstan mámleketlik denetárbiya hám sport universiteti Nókis filialında pitkeriwshi kurs studentlerin turaqlı jumıs orınları menen bántligin támiyinlew maqsetinde, «Bos jumıs orınları miynet yarmarkası» shólkemlestirildi. Onda respublikamızdaǵı 80 mákeme, kárxana hám shólkemler 112 bos jumıs ornı menen qatnastı.
Yarmarkada Qaraqalpaqstan Respublikası Kámbaǵallıqtı qısqartıw hám bántlik ministrliginiń bólim baslıǵı Salamat Erimbetov hám Ózbekstan Milliy banki Qaraqalpaqstan filialı qánigesi Nawrız Ibraimovlar ilaj qatnasıwshılarına mákeme, kárxana hám shólkemlerinde bar jumıs orınları haqqında maǵlıwmatlar berip ótti.
-Jaslardıń bántligin támiyinlew, ásirese, student-jaslardı kásip-óner iyelewge baǵdarlaw, jumısqa jaylastırıw maqsetinde, shólkemlestirilgen bul miynet yarmarkasında student-jaslar óz qánigelikleri boyınsha bos jumıs orınları menen tanısıw imkaniyatına iye boldı,-deydi Ózbekstan mámleketlik denetárbiyası hám sport universiteti Nókis filialı Studentler ámeliyatı bóliminiń bas qánigesi Marhabo Wrazbaeva.-Sonıń ishinde, ótkerilgen yarmarkada 3 pitkeriwshi menen jumıs beriwshiler arasında óz-ara shártnama dúzildi hám ekewine arnawlı jollamalar berildi. Aldaǵı waqıtları da pitkeriwshilerimizdi turaqlı jumıs orınları menen támiyinlew boyınsha tiyisli ilajlar alıp barıla beredi.

Adilbay Orazov,
Qaraqalpaqstan xabar agentligi sholıwshısı