Shıǵıstıń ullı oyshılları insandı ádep-ikramlılıq jaqtan jetilistiriw, onı hár tárepleme rawajlandırıp, ruwxıy kelbetin qáliplestiriwdi jámiyet rawajlanıwınıń áhmiyetli faktorı, dep bilgen hám bul – áyne haqıyqat bolıp tabıladı.

Esletip ótiw kerek, ádep-ikramlılıq – insan haqqında jaǵımlı tásir oyatatuǵın, biraq jámáát, jámiyet hám insaniyat turmısında onsha úlken áhmiyetke iye bolmaytuǵın, milliy úrp-ádetlerge tiykarlanǵan gózzal is-háreketlerdi óz ishine aladı.
Minez-qulıq – shańaraq, jámáát, máhállede, kóshede, jámiyetlik orınlarda áhmiyetli bolǵan, biraq jámiyet hám insaniyat turmısına sezilerli tásir kórsetpeytuǵın jaǵımlı insanıy is-háreketler jıyındısı.
Ádep-ikramlılıq bolsa jámiyet, zaman, adamzat tariyxı ushın úlgi bola alatuǵın unamlı is-háreketler jıyındısı.
Ádep-ikramlılıqtıń qáliplesiwi hám sociallıq ornında dinniń áhmiyeti úlken. Insanǵa jamanlıqtıń zıyanların túsindiriw hám qıysıq jolǵa kirgenlerdi durıs turmıs zawqına shaqırıw da muqaddes Islam dininiń wazıypalarınan.
Jańa Ózbekstan dáwirinde diniy-mánawiy miyrastı qásterlep saqlaw, úgit-násiyatlaw hám zamanagóy texnologiyalar arqalı jámiyetshilikke jetkeriw baǵdarında sistemalı jumıslar alıp barılmaqta. Mine, usınday baslamalardan biri sıpatında Ózbekstandaǵı Islam civilizaciyası orayında sociallıq-ádep-ikramlılıq hám tárbiyalıq áhmiyetke iye hádisler toplamınıń elektron bazasın jaratıw rejelestirilmekte.
Bul joybar sheńberinde 1500 hádisti óz ishine alǵan elektron baza qáliplestiriledi. Onda insan ádebi, shańaraq, qarım-qatnas mádeniyatı, hadallıq, ádillik, sabır-taqat, miyrim-shápáát sıyaqlı túrli temalarǵa baylanıslı hádisler jámlenedi.
Bul baza úlken dárek wazıypasın atqaradı, delinedi Islam civilizaciyası orayınıń maǵlıwmatında. Ásirese, orayǵa keliwshiler ózlerin qızıqtırǵan temalar boyınsha hádislerdi izlep tabıw, oqıw hám tallaw imkaniyatına iye boladı. Bul, sonday-aq, hádis ilimin ǵalaba en jaydırıw, jas áwladqa islam ádep-ikramlılıǵın sińdiriwde áhmiyetli rol atqaradı.

A.RUSTAMOV, ÓzA